ԵՐԵՎԱՆ, 26 հուլիսի – Sputnik. «FlyOne» ավիաընկերության Երևան-Քիշնև չվերթի ուղևորները կրկին, ինչպես երեք օր առաջ, խնդիրների են բախվել։ Հայաստանում «Եվրասիա» ՀԿ-ի ներկայացուցիչ, բլոգեր Միկա Բադալյանը հայտնել է, որ ուղևորներին, այդ թվում՝ իրեն, որոշ ժամանակ թույլ չեն տվել ինքնաթիռ նստել:
Բացի բլոգերից, ինքնաթիռ չեն կարողացել նստել Ռուսաստանի այլ քաղաքացիներ ևս։
«Մարդիկ արդեն լաց են լինում «FlyOne»-ի գրասենյակի մոտ, որոշ կանայք սպառնում են իրենց վնասել։ Ծայրահեղ իրավիճակ է, իսկ ավիաընկերությունն ուղղակի ասում է, որ ինքնաթիռը փոխվել է»,- պատմել է Բադալյանը։
Նրա խոսքով՝ ընկերությունը 180 տոմս է վաճառել, մինչդեռ ինքնաթիռը նախատեսված է 136 հոգու համար: Բադալյանի նկարահանած տեսանյութում ընկերության աշխատակիցն ասում է, որ պետք է մի փոքր սպասել։ Երբ բլոգերը հարցնում է, թե կոնկրետ ինչին պետք է սպասել, տղամարդը պատասխանում է․ «Գրանցման ավարտին»:
Ավելի ուշ բլոգերին այնուամենայնիվ հաջողվել է ինքնաթիռ նստել, սակայն նա ընդգծել է, որ ավիափոխադրողի գործողություններն արձագանք են պահանջում, քանի որ շատ ուղևորներ այդպես էլ չեն կարողացել մեկնել։
«FlyOne»-ից Sputnik Արմենիային հայտնեցին, որ այսօրվա իրավիճակն առաջացել է երկու օր առաջ տեղի ունեցած միջադեպի պատճառով: Այն ժամանակ անսարքության պատճառով ինքնաթիռը փոխարինել էին ավելի փոքրով, և ուղևորների մի մասը չէր կարողացել ժամանակին թռչել։ Այսօր ուղևորներին տարանցիկ չվերթեր են առաջարկել Թբիլիսիով կամ Ստամբուլով, կամ փոխհատուցում՝ ուրիշ ժամանակ մեկնելու հնարավորությամբ։ Ընկերությունից հիշեցրին նաև, որ նստեցման համար ուղևորների առաջնահերթությունը որոշվում է ավտոմատացված համակարգով:
Հիշեցնենք, որ Քիշնև չվերթի հետ կապված նմանատիպ իրավիճակ էր տեղի ունեցել հուլիսի 23-ին, երբ նախապես տոմսեր գնած տասնյակ ուղևորներ չէին կարողացել մեկնել և ստիպված էին եղել հետաձգել իրենց ծրագրերը: