ԵՐԵՎԱՆ, 26 հուլիսի – Sputnik. Տավուշի մարզի Կիրանց գյուղում տրված կադաստրային վկայականները համարվում են ճիշտ, քանի դեռ գրանցումը դատարանով անվավեր չի ճանաչվել։ Այս մասին այսօր մամուլի ասուլիսի ժամանակ հայտարարեց ՀՀ կադաստրի կոմիտեի ղեկավարի խորհրդական Արմեն Ալեքսանյանը։
Նա նշեց, որ այդ փաստաթղթերն ունեն ապացուցողական ուժ։
«Մնացած տեղեկատվությանը չեմ տիրապետում»,– ասաց Ալեքսանյանը։
Հիշեցնենք, որ հայ–ադրբեջանական սահմանազատման հետևանքով Կիրանցի մի քանի տներ ու հողամասեր անցնում են Ադրբեջանին։ ՀՀ արդարադատության նախարարություն մայիսի 20-ին հայտարարեց, որ այդ գյուղում կադաստրի կոմիտեի կողմից իրավունքների պետական գրանցումները կատարվել են ոչ ճշգրիտ տվյալների հիման վրա: