ԵՐԵՎԱՆ, 25 հուլիսի – Sputnik. ԱՄՆ Ներկայացուցիչների պալատի նախկին խոսնակ, Դեմոկրատական կուսակցության անդամ Նենսի Փելոսին քննադատել է Իսրայելի վարչապետ Բենիամին Նեթանյահուի ելույթը Կոնգրեսում՝ այն որակելով «վատագույնը պալատի պատմության մեջ»:
Փելոսին մասնավորապես դատապարտել է ՀԱՄԱՍ-ի պատանդներին ազատելու հարցում առաջընթացի բացակայությունը։
«Ներկայացուցիչների պալատում Բենիամին Նեթանյահուի ելույթը, անկասկած, ամենավատն էր այն բոլոր օտարերկրյա առաջնորդների ելույթներից, որոնք երբևէ պատիվ են ունեցել դիմելու ԱՄՆ Կոնգրեսին»,- գրել է Փելոսին X-ի իր էջում։
Ինքը՝ նախկին խոսնակը, բոյկոտել է այդ միջոցառումը, որպեսզի մասնակցի ՀԱՄԱՍ-ի կողմից պահվող իսրայելցի պատանդների ընտանիքների, ինչպես նաև ռազմական գործողությունների ընթացքում զոհված իսրայելցիների ընտանիքների հետ հանդիպմանը:
«Մեզանից շատերը, ովքեր սիրում են Իսրայելը, մեկ օր անցկացրին՝ լսելով Իսրայելի այն քաղաքացիներին, որոնց ընտանիքները տուժել էին հոկտեմբերի 7-ին ՀԱՄԱՍ-ի ահաբեկչության հետևանքով: Այս ընտանիքները հրադադար են պահանջում, որը պատանդներին կվերադարձնի տուն, և մենք հուսով ենք, որ վարչապետն իր ժամանակը կծախսի այդ նպատակին հասնելու համար»,-ամփոփել է քաղաքական գործիչը։
Ինչպես նշում է «The Hill» պարբերականը, ԱՄՆ դեմոկրատական կուսակցության առաջատար ներկայացուցչի հայտարարությունն ընդգծում է Նեթանյահուի և կուսակցության միջև աճող անջրպետը: Չնայած Իսրայելի լայն աջակցությանը` դեմոկրատներն ավելի ու ավելի են քննադատում Նեթանյահուին՝ ԱՄՆ նախագահ Ջո Բայդենի` պատանդներին ազատ արձակելու առաջարկը չընդունելու համար:
Ներկայացուցիչների պալատի և Սենատի դեմոկրատ անդամների շուրջ կեսը բաց է թողել Նեթանյահուի երկար ելույթը, որը պնդել է, թե ԱՄՆ–ում Իսրայելի դեմ բողոքողներին աջակցում է Իրանը, ինչպես նաև քննադատել է իր հակառակորդներին:
Նեթանյահուն նաև դրվատել է Բայդենին Իսրայելին աջակցելու համար և Կոնգրեսին կոչ է արել կրկնապատկել ռազմական և ֆինանսական օգնությունը:
«Ես խորապես գնահատում եմ Ամերիկայի աջակցությունը, այդ թվում՝ ներկա պատերազմում, բայց սա բացառիկ պահ է։ Ամերիկյան ռազմական օգնության արագացումը կարող է զգալիորեն մոտեցնել Գազայի պատերազմի ավարտը և օգնել կանխել Մերձավոր Արևելքում ավելի մեծ պատերազմը», — ասել է նա:
Նշենք, որ Նեթանյահուի ելույթը բողոքի զանգվածային ցույցեր է առաջացրել նաև Կապիտոլիումի սահմաններից դուրս: Օրենսդիր մարմնի շենքի մոտ հանրահավաք է տեղի ունեցել, որի ընթացքում, ոստիկանության տվյալներով, առնվազն 11 մարդ է ձերբակալվել: