ԵՐԵՎԱՆ, 25 հուլիսի – Sputnik. ՀՀ Արմավիրի մարզի համանուն քաղաքում 530 մլն դրամով մինչև 2026 թ. կկառուցվի «Թումո» կենտրոն։ Որոշումն ընդունվեց ՀՀ կառավարության այսօրվա նիստի ժամանակ, որը վարում էր ՀՀ փոխվարչապետ Տիգրան Խաչատրյանը։ Նշենք, որ ՀՀ վարչապետ Նիկոլ Փաշինյանն ու ՀՀ փոխվարչապետ Մհեր Գրիգորյանը արձակուրդում են։
ՀՀ տարածքային կառավարման և ենթակառուցվածքների նախարար Գնել Սանոսյանը նշեց, որ «Սիմոնյան» կրթահամալիրի և Արմավիրի մարզպետարանի ու համայնքապետարանի միջև ձեռք է բերվել պայմանավորվածություն, որ քաղաքում համայնքային սեփականություն հանդիսացող մանկապարտեզի շենքում կկառուցվի «Թումո» կենտրոն։
Նախատեսվում է, որ այս կենտրոն կհաճախեն 12–18 տարեկան շուրջ 3 800 երեխա։
Նախարարը տեղեկացրեց, որ այս պահին հանրապետությունում գործում է 5 «Թումո» կենտրոն, որտեղ արդեն իսկ հաճախում է 25 հազար ուսանող։
Սանոսյանը նաև նշեց, որ ընթացքի մեջ են Եղեգնաձորի «Թումո» կենտրոնի կառուցման աշխատանքները, որի բացումը նախատեսված է սեպտեմբերին, և Մասիսի կենտրոնը, որը կբացվի մինչև տարեվերջ` դեկտեմբերին։