ԵՐԵՎԱՆ, 19 հուլիսի – Sputnik, Դավիթ Գալստյան. Արաքս գետի վրա պատնեշի կառուցման նախագծային փաստաթղթերը Թուրքիայի հետ համաձայնեցման փուլում են։ Այս մասին Sputnik Արմենիայի հարցմանն ի պատասխան հայտնեցին տարածքային կառավարման և ենթակառուցվածքների նախարարությունից։
«Արաքս գետը նախկին հուն վերադարձնելու նպատակով Բուրաստան և Արաքսավան համայնքների հատվածում պատնեշի կառուցման վերաբերյալ հայտնում ենք, որ նախագծային փաստաթղթերը թուրքական կողմի հետ համաձայնեցման փուլում են», - ասացին նախարարությունից:
Տարեսկզբին Sputnik Արմենիայի նախորդ հարցմանն ի պատասխան ՏԿԵՆ-ից հայտնել էին, որ ընթացքում են նախագծային փաստաթղթերը ՌԴ սահմանապահ զորքերի ղեկավարության, անհրաժեշտության դեպքում նաև թուրքական կողմի հետ համաձայնեցնելու ու դրանց ընթացակարգերի վերաբերյալ քննարկումներ անելու փուլերը։
Ավելի վաղ գրել էինք, որ Արաքսավան և Բուրաստան համայնքների շրջանում Արաքս գետը նախկին հուն վերադարձնելու համար ամբարտակի կառուցման արժեքը կկազմի մոտ 1 մլն դոլար:
Հիշեցնենք, որ ավազի ապօրինի արդյունահանման հետևանքով Արաքս գետը, որով անցնում է Թուրքիայի հետ սահմանը, փոխել է հունը, և դրա սահմաններից դուրս ձևավորվել է մոտ 400 հա մակերեսով կղզի:
Խնդիրներից խուսափելու համար նախարարությունն առաջարկել է Արաքս գետի ներկայիս հունի վրա կառուցել մոտ 130 մ երկարությամբ և 8 մ խորությամբ ամբարտակ-պատնեշ՝ գետի ջրերը նախկին հուն ուղղելու համար: