ԵՐԵՎԱՆ, 18 հուլիսի – Sputnik. Կիրանցի բնակիչները ՀՀ մարդու իրավունքների պաշտպանին չեն դիմել իրենց կորցրած սեփականության հարցով։ Այս մասին ՀՀ կառավարության նիստից հետո լրագրողների հետ զրույցում ասաց ՀՀ ՄԻՊ Անահիտ Մանասյանը։
«Չեն եղել անհատական դիմումներ, բայց գույքային իրավունքների երաշխավորման հարցը ոչ միայն Կիրանցում, այլ նաև մյուս սահմանամերձ գյուղերում ես անձամբ եմ բարձրացրել»,– ասաց ՄԻՊ–ը։
Ըստ Մանասյանի` քաղաքացիները պետք է ստանան փոխահատուցում ոչ միայն այն դեպքում, երբ ունեն սեփականության իրավունքի վկայական, այլ նաև այն դեպքում, երբ սեփականության իրավունքի վկայական չունեն, բայց ունեն գույքային իրավունքներ, որոնք որոշակի առումով պետության պարտավորության ներքո են գտնվում։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվեցին սահմանազատումը սկսել Տավուշի մարզից։
ՀՀ վարչապետի աշխատակազմը հայտարարեց, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Մայիսի 24–ին ՀՀ ԱԱԾ–ն հայտնեց, որ ՀՀ Ազգային անվտանգության ծառայության սահմանապահ զորքերը պաշտոնապես ստանձնում են Հայաստանի Հանրապետության պետական սահմանի Տավուշի մարզի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ հատվածների պահպանությունը։