ԵՐԵՎԱՆ, 18 հուլիսի – Sputnik. Հայաստանում կընդլայնվի շարժվող ռոբոտների և սարքերի տեխնիկների ուսուցման պետպատվերով տեղերի թիվը։ Այս մասին ասված է քոլեջներում և արհեստագործական ուսումնարաններում 2024–25 ուսումնական տարվա համար անվճար ուսումնական տեղերի բաշխման մասին ՀՀ կառավարության այսօր ընդունած որոշման մեջ:
Ընդհանուր առմամբ, այս տարվա համար միջին մասնագիտական կրթության համակարգում անվճար ուսումնական տեղերի քանակը մնացել է նույնքան, որքան 2023–24 թթ.` մասնագիտական դպրոցներում ավելի քան 3 300, իսկ տեխնիկական դպրոցներում և քոլեջներում՝ ավելի քան 6000:
Անցյալ տարի փորձնական ծրագրով մեր երկրի մասնագիտական ուսուցման համակարգում ներդրվել են այս ու մի շարք այլ մասնագիտություններ, այդ թվում՝ վերականգնվող էներգետիկայի կայանների, էլեկտրամոբիլների, կաթիլային ոռոգման համակարգերի տեխնիկներ, ներկարարներ եւ սվաղագործներ, կահույքագործներ, կռունկավարներ, ինչպես նաեւ ֆերմերային մասնագիտություններ:
Այս տարի մասնագիտական (արհեստագործական) հաստատություններում նախատեսվում է ներդնել կաշվե իրեր կարելու, ավտոմեքենաների ախտորոշման, ապակու կտրման և մշակման տեխնոլոգիաների, իսկ միջին մասնագիտացմամբ՝ կենսաքիմիական արտադրության տեխնոլոգի, էլեկտրագնացքի մեքենավարի, երկրորդային հումքի վերամշակման տեխնոլոգի մասնագիտություններ:
Առաջնահերթ կարգով անվճար տեղեր կհատկացվեն արհեստագործական ուսումնարաններին և քոլեջներին այն շրջաններում, որտեղ ուսանողների մոտ 90 %–ն արդեն անվճար է սովորում:
Նշենք, որ 2022–23 թթ. ուսումնական տարվանից անվճար տեղեր չեն հատկացվում գրասենյակային ոլորտի աշխատողների պատրաստման, առևտրի, ֆինանսների և գովազդի համար: