ԵՐԵՎԱՆ, 18 հուլիսի – Sputnik․ Ռուսաստանը միշտ եղել և շարունակում է մնալ հավատարիմ դաշնակցային պարտավորություններին, այդ թվում՝ Հայաստանի անվտանգության ապահովման առումով։ Այս հայտարարությունն արեց ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ։
Նա ընդգծեց, որ Մոսկվան ձգտում է գտնել փոխընդունելի հանգուցալուծումներ Երևանի և Բաքվի միջև հակամարտության հարցում, սակայն պետք է սկզբունքորեն հասկանալ՝ արդյոք Հայաստանը հավատարի՞մ է իր դաշնակցային պարտավորություններին:
Անդրադառնալով անվտանգության ոլորտում ՀՀ–ի` ԱՄՆ-ի և ՆԱՏՕ-ի հետ փոխգործակցությանը, համատեղ զորավարժություններին՝ Զախարովան ասաց, որ Երևանի՝ համակարգային բնույթ ձեռք բերող քայլերը խաթարում են տվյալ ոլորտում փոխգործակցության մշակված մեխանիզմների գործարկման հեռանկարները:
Նա նշեց, որ Արևմուտքի գործողությունները տարածաշրջանում վտանգում են խաղաղությունը, որը, ըստ էության, կարող է վերածվել փխրուն զինադադարի, իսկ հնարավոր է՝ նույնիսկ կոտրվի էլ: