ԵՐԵՎԱՆ, 16 հուլիսի – Sputnik. Դատավոր Աննա Դանիբեկյանի լիազորությունները դադարեցնելու որոշումը հերթական քաղաքական շոուն է։ Այս մասին Yerevan.Today-ի հետ զրույցում ասել է ՀՀ երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանը։
Ավելի վաղ հայտնել էինք, որ էական կարգապահական խախտման հիմքով դադարեցվել են Երևանի առաջին ատյանի դատավոր Դանիբեկյանի լիազորությունները։
«Դատավոր Դանիբեկյանի լիազորությունները պետք է դադարեցվեին ոչ թե ձգձգելու, այլ՝ ապօրինի և հակասահմանադրական քրեական գործն ավելի վաղ չկարճելու, նախագահ Քոչարյանին ապօրինաբար, շուրջ 1,5 տարի կալանավորված պահելու համար։ Սա հերթական քաղաքական շոուն է, արդեն՝ ԲԴԽ մասնակցությամբ»,- ասել է Միկոյանը։
Նա նաև հիշեցրել է, որ ԲԴԽ նախագահ Կարեն Անդրեասյանի համար «պատմության ամենակարևոր», իսկ բոլորին ավելի հայտնի՝ «Սիլվայի գործով» դեռևս 2019 թվականին դատարաններն իրենց որոշումներով արձանագրել էին, որ դրանում նույնիսկ հիմնավոր կասկած չի եղել:
Հիշեցնենք, որ ԲԴԽ միջնորդություն էր ներկայացրել ՀՀ արդարադատության նախարար Գրիգոր Մինասյանը։ ԲԴԽ նախագահ Կարեն Անդրեասյանն էլ որոշումը հրապարակելիս հայտարարեց, որ երկար ձգձգված ու վաղեմության ժամկետի հիմքով կարճված ՀՀ 2-րդ նախագահ Ռոբերտ Քոչարյանի գործը բացառիկ կարևորություն է ունեցել։ Հետևաբար, Դանիբեկյանը պետք է գիտակցեր, որ արդարադատություն է իրականացնում է ՀՀ դատաիրավական պրակտիկայի ամենակարևոր գործերից մեկով և պետք է արդյունավետ կազմակերպվեր ու ողջամիտ ժամկետում իրականացներ արդարադատություն։
Նշենք, որ դատավարությունը տևել է 4 տարի 4 ամիս։