Հայաստանո՞ւմ, թե՞ արտերկրում. երբ և որտեղ են պատրաստվում հանգստանալ նախարարները

ԵՐԵՎԱՆ, 15 հուլիսի - Sputnik. Արձակուրդային շրջանը թեպետ մեկնարկել է, սակայն ՀՀ նախարարների մեծ մասը դեռ չի շտապում մեկնել հանգստի։

Sputnik Արմենիան փորձեց պարզել, թե նախարարները երբ և որտեղ են պատրաստվում անցկացնել իրենց արձակուրդը։ Մեծամասնությունը տվեց միանման պատասխան` արձակուրդ մեկնելու ժամկետները դեռևս հստակեցված չեն։

Առողջապահության նախարարությունից մեզ հայտնեցին, որ Անահիտ Ավանեսյանը չի պատրաստվում արձակուրդ գնալ ամռան ամիսներին։

Մարտից էկոնոմիկայի նախարարի պաշտոնը զբաղեցնող Գևորգ Պապոյանի աշխատանքային գրաֆիկն այնքան ծանրաբեռնված է, որ նա այս տարի ընդհանրապես արձակուրդ չի վերցնելու։

Աշխատանքի և սոցիալական հարցերի նախարար Նարեկ Մկրտչյանը որոշել է` առավելագույնը 2 շաբաթ կհանգստանա, սակայն երբ և որտեղ` դեռ չի պլանավորել։

ՀՀ բարձր տեխնոլոգիաների արդյունաբերության նախարար Մխիթար Հայրապետյանը նույնպես այս պահի դրությամբ չի պլանավորել իր հանգիստը: Պարզ է միայն, որ հուլիսի ընթացքում նա արձակուրդ չի գնալու:

ՀՀ ներքին գործերի, արդարադատության, տարածքային կառավարման և ենթակառուցվածքների, ԿԳՄՍ նախարարություններից ստացանք նույնաբովանդակ պատասխան` 2024թ. ամենամյա արձակուրդի մեկնելու ժամկետները դեռևս հստակեցված չեն։

Հստակ է ՀՀ արտգործնախարար Արարատ Միրզոյանի արձակուրդ մեկնելու ժամկետը. ՀՀ վարչապետի որոշմամբ Միրզոյանն արձակուրդում կլինի հուլիսի 22-ից 26–ը, սակայն թե որտեղ է արտաքին քաղաքական գերատեսչության ղեկավարը նախընտրում հանգստանալ, նախարարության խոսնակը չմանրամասնեց։

Նախարարներից այս պահին միայն շրջակա միջավայրի նախարարության ղեկավար Հակոբ Սիմիդյանն է օգտվել իր ամենամյա արձակուրդից (հունիսի 19-28-ը)։ Նախարարությունից հայտնեցին, որ Սիմիդյանը նախընտրել է իր արձակուրդային օրերն անցկացնել Հայաստանում։

Հայաստանում կհանգստանա նաև ՀՀ ֆինանսների նախարար Վահե Հովհաննիսյանը, որն այսօրվանից է մեկնում արձակուրդ՝ 10 աշխատանքային օրով (հուլիսի 15-26-ը)։

Հիշեցնենք` այսօրվանից հանգստի է մեկնում նաև ՀՀ վարչապետ Նիկոլ Փաշինյանը։ Նա արձակուրդում կլինի մինչև օգոստոսի 12–ը։