ԵՐԵՎԱՆ, 12 հուլիսի – Sputnik. Հայաստանի ու Վրաստանի պաշտպանության նախարարությունները ստորագրել են 2024 թվականի համագործակցության պլանը։ Տեղեկությունը հայտնում է ՀՀ պաշտպանական գերատեսչությունը։
Փաստաթուղթը ստորագրել են նախարարությունների ղեկավարները` Սուրեն Պապիկյանն ու Իրակլի Չիկովանին։
Ավելի վաղ հայտնել էինք, որ Վրաստանի պաշտպանության նախարարը պաշտոնական այցով ժամանել է Հայաստան։
ՊՆ վարչական համալիրում դիմավորման հանդիսավոր արարողությունից հետո տեղի է ունեցել Պապիկյանի և Չիկովանիի առանձնազրույցը, որին հաջորդել է պատվիրակությունների ընդլայնված կազմով հանդիպումը:
Հանդիպման ընթացքում բարձր է գնահատվել համագործակցության ներկայիս մակարդակը։ Քննարկվել են պաշտպանության բնագավառում Հայաստան-Վրաստան համագործակցությանը և տարածաշրջանային անվտանգությանն առնչվող հարցեր:
Կողմերը միմյանց ներկայացրել են նաև երկու երկրների զինված ուժերում ընթացող բարեփոխումների վերաբերյալ մանրամասներ: