ՀՀ ԱԺ–ն միաձայն ընդունեց ԼՂ ԱԱԾ–ի նախկին ծառայողների վերաբերյալ օրինագիծը

ԵՐԵՎԱՆ, 12 հուլիսի – Sputnik. ՀՀ Ազգային ժողովն արտահերթ նիստում ընդունեց Լեռնային Ղարաբաղից տեղահանված և 2023 թ. սեպտեմբերի 19–ի դրությամբ ԼՂ ԱԱԾ–ում պաշտոն զբաղեցրած անձանց ՀՀ անվտանգային մարմիններում ծառայությունը շարունակելու օրինագիծը։

Նախագիծն ընդունվեց միաձայն` 91 կողմ, 0 դեմ, 0 ձեռնպահ։

Նշենք, որ առաջարկվող փոփոխությամբ ՀՀ ԱԱԾ թափուր պաշտոն առաջանալու դեպքում ծառայության կարող են անցնել և պաշտոնի նշանակվել նաև 2023 թ. սեպտեմբերի 19-ի դրությամբ ԼՂ ԱԱԾ–ում պաշտոն զբաղեցրած անձինք։

Միաժամանակ հաշվի է առնվելու ԼՂ–ում նրանց ծառայության ժամանակահատվածը, զբաղեցրած պաշտոնը և կոչումը։ Նշված կարգավորումը ժամանակավոր է գործելու` մինչև 2025 թ. հուլիսի 1–ը։

ՀՀ Ազգային ժողովն այսօրվա արտահերթ նիստով ավարտեց գարնանային նստաշրջանի աշխատանքները։ Պատգամավորները գնացին արձակուրդ։ ԱԺ աշնանային նստաշրջանը կսկսվի սեպտեմբերի 9–ից։