ԵՐԵՎԱՆ, 9 հուլիսի – Sputnik. Հուլիսի 10-ից փակ կլինի Տավուշի մարզի Կիրանց գյուղով անցնող ճանապարհահատվածը։ Տեղեկությունը հայտնում է «Ճանապարհային դեպարտամենտ» հիմնադրամը։
Նշվում է, որ ճանապարհը փակելու պատճառը շինարարական աշխատանքներն են, բայց չի հստակեցվում, թե որքան ժամանակով է գյուղով անցնող ճամփան փակ լինելու։
«Շինարարական աշխատանքներով պայմանավորված՝ հուլիսի 10-ից երթևեկության համար ժամանակավորապես կփակվի Հ-58 հանրապետական նշանակության ճանապարհի Կիրանց գյուղով անցնող հատվածը»,- նշված է հաղորդագրության մեջ։
Դեպարտամենտը վարորդներին խորհուրդ է տալիս այդ հատվածը շրջանցել Հ-58-Աճարկուտ-Հ-58 ավտոճանապարհով։
Հիշեցնենք՝ Աճարկուտով անցնող ճանապարհը Կիրանց գյուղ գնալու այլընտրանքային ճանապարհ կդառնա, երբ սահմանազատման շրջանակներում բնակավայրի մուտքի ճանապարհային կամուրջը կհանձնվի Ադրբեջանին։ Դելիմիտացիայի շրջանակում Կիրանցի տարածքի մի մասը՝ երկու տուն, կամուրջ, դեպի Վրաստան միջպետական ճանապարհի հատված և նախապես 50-ից ավելի հողամասեր, պետք է անցնեն Ադրբեջանին։