ԵՐԵՎԱՆ, 7 հունիսի - Sputnik. Թուրքիայի նախագահ Ռեջեփ Թայիփ Էրդողանը հայտարարել է, որ վերջին երկու-երեք օրվա ընթացքում Գազայի շուրջ բանակցությունների ընթացքում դրական քայլեր են ձեռնարկվել, որոնք նախատեսում են կայուն հրադադար:
««Մոսադի» ղեկավարը Դոհայում բանակցություններ է վարել ՀԱՄԱՍ-ի ներկայացուցիչների հետ։ Հիմա կրակի դադարեցման մասին խոսելիս` ասում են` ցանկացած պահի։ Այլ կերպ ասած` այնտեղից լուրերը կարող են գալ ցանկացած պահի»,-Գերմանիայից վերադառնալուց հետո ինքնաթիռում լրագրողներին ասել է Թուրքիայի նախագահը։
Նրա խոսքով ՝ իրավիճակը կախված կլինի Իսրայելի վարչապետ Բենյամին Նեթանյահուի պահվածքից:
«Իսրայելն այլևս չպետք է շարունակի այդ դաժանությունը, այդ վայրենությունը։ Իսրայելը պետք է դադարեցնի ժամանակ ձգել և պետք է վերջ տա այդ անմարդկային հարձակումներին։ Այս կապակցությամբ միջազգային հանրությունը և հատկապես արևմտյան երկրները պետք է ուժեղացնեն ճնշումը Իսրայելի վրա։ Մինչ օրս հենց Իսրայելն է շարունակում հարձակումներն ու զանգվածային սպանությունները։ Հենց Իսրայելն է ոտնահարում մարդու իրավունքները և միջազգային իրավունքը։ Այժմ նրանք սպառնում են Լիբանանին, որպեսզի հակամարտությունը տարածվի ամբողջ տարածաշրջանում և թեթևացնի իրենց վիճակը։ Իսրայելը պետք է հրաժարվի տարածաշրջանում հակամարտություններ տարածելու իր մտադրությունից», - ասել է Թուրքիայի նախագահը։
Նա նաև հայտարարել է, որ արևմտյան երկրները, հատկապես Ամերիկայի Միացյալ Նահանգները, այս փուլում պետք է հրաժարվեն Իսրայելին աջակցելուց:
Իսրայելը 2023 թվականի հոկտեմբերի 7-ին Գազայի հատվածից աննախադեպ մասշտաբային հրթիռային հարձակման է ենթարկվել։ Այնուհետև պաղեստինյան ՀԱՄԱՍ շարժման մարտիկները ներխուժել են սահմանամերձ շրջաններ՝ կրակ բացելով զինվորականների և քաղաքացիական անձանց վրա, ավելի քան 250 պատանդ են վերցրել։
Իսրայելի պաշտպանության բանակը Գազայի հատվածում սկսել է «Երկաթե թրեր» գործողությունը, որը ներառում է հարվածներ քաղաքացիական օբյեկտների ուղղությամբ: Իսրայելը հայտարարել է անկլավի ամբողջական շրջափակման մասին. դադարեցվել են ջրի, էլեկտրականության, վառելիքի, սննդամթերքի և դեղորայքի մատակարարումները: