ԵՐԵՎԱՆ, 7 հուլիսի – Sputnik. Այսօր Երևանի Կարեն Դեմիրճյանի անվան մարզահամերգային համալիրում մեկնարկեց «Ոսկե ծիրան» 21-րդ միջազգային կինոփառատոնը:
Այս տարի կինոփառատոնը կանցնի առանց ավանդական կարմիր գորգի. դրան կփոխարինեն նկարիչ Դավիթ Քոչունցի էսքիզներով հայ վարպետների կողմից պատրաստված գորգերը «Հղման կետ» (Point Of Reference) հավաքածուից:
«Գորգերի շարքը տնայնագործ կանայք են գործել Հայաստանի հարավային շրջաններում ու Արցախում։ Յուրաքանչյուր կտոր, որը դուք տեսնում եք, կոնկրետ մի տեղանվան արվեստային կոդավորում է»,– լրագրողների հետ զրույցում ասաց կինոփառատոնի տնօրեն Կարեն Ավետիսյանը։
Այս տարի լիամետրաժ ֆիլմերի մրցույթի ժյուրիի նախագահն է օսկարակիր ռեժիսոր Ալեքսանդր Փեյնը։ Նա լրագրողներին ասել է, որ վաղուց էր ցանկանում մասնակցել հայկական կինոփառատոնին, սակայն զբաղվածության պատճառով անընդհատ չէր ստացվում։
«Ուրախ եմ, որ վերջապես կարողացա ժամանակ գտնել և ընդունել առաջարկը»,– ասել է Փեյնը։
«Ոսկե ծիրան» 21-րդ միջազգային կինոփառատոնի պատվավոր հյուրն այս տարի կրկնակի օսկարակիր, դերասան Քևին Սփեյսին է։ Նա ժամանել էր Երևան երեկ երեկոյան։
Դերասանը պատմել է լրագրողներին, որ արդեն ամբողջությամբ երևանյան տրամադրության մեջ է, անգամ հասցրել է մասնակցել Վարդավառին։ Խոսելով «Ոսկե ծիրան» կինոփառատոնի մասին նա նշել է, որ չափազանց ուրախ է լինել միջոցառման մի մասը։
«Կարծում եմ՝ այսպիսի կինոփառատոնները շատ կարևոր են, քանի որ միավորում են մարդկանց, ովքեր պատմություններ են պատմում, միմյանցից սովորում են, միմյանց ողջունում են, ժամանակ անցկացնում։ Կարծում եմ, որ սա հրաշալի մի բան է, որն անում են փառատոնները՝ աջակցելով կինոյին»,– ասել է Սփեյսին լրագրողների հետ զրույցում։
«Կարմիր գորգի» արարողությունից հետո հյուրերը դիտել են կինոփառատոնի բացման ֆիլմը, որն այս տարի կանադահայ կինոռեժիսոր Ատոմ Էգոյանի «Յոթ քողն» էր։ Ֆիլմի պրեմիերան կայացել է նախորդ տարվա Տորոնտոյի կինոփառատոնում։
Նշենք , որ Էգոյանը չէր մասնակցել «Ոսկե ծիրան» կինոփառատոնին 12 տարի։
Ֆիլմի ավարտին Ատոմ Էգոյան ու փառատոնի պատվավոր հյուր Քևին Սփեյսին ստացան «Ոսկե ծիրանի» գլխավոր մրցանակը` փարաջանովյան թալլերը:
Հիշեցնենք` «Ոսկե ծիրանն» այս տարի տեղի կունենա հուլիսի 7-14-ը։ Այս տարի ևս միջազգային կինոտոնը հանրությանը կներկայացնի մրցութային կինոնկարներ աշխարհի տարբեր երկրներից, ինչպես նաև ֆիլմեր ամենահեղինակավոր (Կաննի, Բեռլինի և այլն) կինոփառատոներից: Հայաստան կժամանեն կինոյի համաշխարհային դեմքեր, որոնք իրենց փորձն ու արվեստը կներկայացնեն կինոսերներին։
Նշենք նաև, որ «Ոսկե ծիրանն» այս տարի առանձնահատուկ անդրադարձ կկատարի երկու մեծությունների՝ Շառլ Ազնավուրի և Սերգեյ Փարաջանովի 100-ամյա հոբելյաններին: