ԵՐԵՎԱՆ, 6 հուլիսի — Sputnik. Իրանի նոր նախագահ Մասուդ Փեզեշքիանն ավելի ինտենսիվ կզարգացնի երկրի փոխգործակցությունը Թուրքիայի հետ, մինչդեռ Ռուսաստանի հետ հարաբերություններում նրա կուրսը դեռ դժվար է կանխատեսել: «Իզվեստիային» այս մասին ասել է քաղաքագետ Կարինե Գևորգյանը:
«Առայժմ դժվար է ասել ներկայիս փոփոխվող հանգամանքներում, թե ինչ է տեղի ունենալու, և որքանով է պարոն Փեզեշքիանը բարեփոխիչ», - ասել է նա:
Քաղաքագետը հիշեցրել է, որ ավելի վաղ Իրանի գերագույն առաջնորդ Ալի Խամենեին խոստացել էր, որ Մոսկվայի հետ հարաբերություններում Թեհրանի քաղաքականությունն անփոփոխ կմնա: Բացի այդ, նման դիրքորոշում են հնչեցրել նաև իրանցի այլ քաղաքական գործիչներ։
«Ամենայն հավանականությամբ, Թուրքիայի և Ադրբեջանի շուրջ կլինեն որոշ հետաքրքիր շարժեր։ Ոչ միայն այն պատճառով, որ Փեզեշքիանը էթնիկ ադրբեջանցի է։ Հնարավոր է, որ դա ազդի Ռուսաստանի հետ հարաբերությունների վրա, բայց անհասկանալի է, թե որքանով։ Իրանում կան որոշակի ինստիտուտներ, որոնք կարող են սահմանափակել նրա գործողությունները»,–ասել է նա։
Նշենք, որ այսօր հայտնի է դարձել երկրի նախագահական ընտրությունների երկրորդ փուլում Իրանի առողջապահության նախկին նախարար Փեզեշքիանի հաղթանակի մասին։ Նա առաջադրվել էր որպես ռեֆորմիստական թևի թեկնածու։