ԵՐԵՎԱՆ, 6 հուլիսի – Sputnik. ՀՀ վարչապետ Նիկոլ Փաշինյանը շնորհավորել է Մեծ Բրիտանիայի և Հյուսիսային Իռլանդիայի Միացյալ Թագավորության նորանշանակ վարչապետ Կիր Սթարմերին և հույս հայտնել, որ առաջիկայում կհանդիպեն։ Տեղեկությունը հայտնում է ՀՀ վարչապետի մամուլի ծառայությունը։
Նշենք, որ Միացյալ Թագավորության համընդհանուր ընտրություններում հաղթել է Լեյբորիստական կուսակցությունը։
«Ակնկալում եմ, որ առաջիկայում առիթ կունենանք հանդիպելու և քննարկելու մեր երկրների միջև համագործակցությունը խորացնելու հնարավորությունները»,– ասված է ուղերձում։
Նա համոզմունք է հայտնել, որ Սթարմերի առաջնորդությամբ ՄԹ–ն նորանոր հաջողություններ կգրանցի ինչպես ներքին, այնպես էլ արտաքին քաղաքականության բնագավառներում։
Փաշինյանը նաև շեշտել է, որ վերջին տարիներին երկու երկրի միջև հարաբերությունները հետևողականորեն զարգացել ու խորացել են։ ՀՀ վարչապետը հույս է հայտնել, որ ներկայիս դինամիկան ոչ միայն կշարունակվի, այլև կհամալրվի հեռանկարային ծրագրերով։
Խորհրդարանական ընտրություններից հետո լեյբորիստների առաջնորդ Կիր Սթարմերը հուլիսի 4-ին թագավոր Չարլզ III–ի մոտ կայացած ընդունելությունից հետո պաշտոնապես դարձավ Մեծ Բրիտանիայի 58-րդ վարչապետը։ Թագավորը հանձնարարել էր նրան կառավարություն ձևավորել:
Բրիտանական խորհրդարանի ընտրությունները կայացել են հուլիսի 3-ին, հաղթել է Լեյբորիստական կուսակցությունը՝ ստանալով 412 պատգամավորական մանդատ և բացարձակ մեծամասնություն ապահովելով Համայնքների պալատում: