ԵՐԵՎԱՆ, 5 հուլիսի – Sputnik. Ռուսաստանը կողմ է ուկրաինական հակամարտության ամբողջական և վերջնական ավարտին։ Այս հայտարարությունն արել է ՌԴ նախագահ Վլադիմիր Պուտինը Հունգարիայի վարչապետ Վիկտոր Օրբանի հետ համատեղ ասուլիսի ժամանակ։
«Հրադադար կամ դադար պետք չէ Կիևին վերազինելու համար։ Մոսկվան հանդես է գալիս հակամարտության ամբողջական և վերջնական ավարտի օգտին։ Կիևի ռեժիմը մերժում է ռազմական գործողությունները դադարեցնելու միտքը, քանի որ այդ դեպքում կկորցնի ռազմական դրությունը երկարաձգելու պատրվակը, ստիպված կլինեն ընտրություններ անցկացնել։ Իսկ ընտրություններում հաղթելու շանսերը Ուկրաինայի՝ լեգիտիմությունը կորցրած ղեկավարության համար մոտ են զրոյի», - ասել է Պուտինը։
Նա հայտնել է, որ Օրբանի հետ քննարկել է ուկրաինական ճգնաժամի կարգավորման հնարավոր ուղիները:
«Անշուշտ, տեղի է ունեցել կարծիքների բավականին ուղիղ և հանգամանալից փոխանակում միջազգային հրատապ հարցերի, այդ թվում՝ ուկրաինական հակամարտության շուրջ, խոսվել է նաև կարգավորման հնարավոր ուղիների մասին», - նշել է Պուտինը Հունգարիայի վարչապետի հետ բանակցություններից հետո։
ՌԴ նախագահի խոսքով՝ Վիկտոր Օրբանը Կիևում հանդես է եկել կրակը դադարեցնելու կոչով:
«Պարոն վարչապետը պատմեց Կիևում իր վերջին հանդիպումների մասին, որտեղ հանդես է եկել մի շարք առաջարկներով և մասնավորապես կրակը դադարեցնելու կոչով, որպեսզի պայմաններ ստեղծվեն Ռուսաստանի հետ բանակցություններ սկսելու համար», - ասել է Պուտինը:
ՌԴ նախագահն ավելացրել է, որ Կիևում պատրաստ չեն հրաժարվել մինչև վերջ պատերազմելու մտքից։
Նա նաև ընդգծել է, որ Ռուսաստանի խաղաղ նախաձեռնությունների իրականացումը թույլ կտար դադարեցնել ռազմական գործողությունները և բանակցություններ սկսել:
Պուտինը նշել է, որ Ռուսաստանի առաջ քաշած պայմանների թվում է Ուկրաինայի զորքերի ամբողջական դուրսբերումը ՌԴ տարածքից:
«Պայմանները շարադրված են արտաքին գործերի նախարարությունում հնչեցրած իմ ելույթում։ Խոսքը Դոնեցկի, Լուգանսկի ժողովրդական հանրապետություններից, Զապորոժիեի և Խերսոնի մարզերից Ուկրաինայի բոլոր զորքերի ամբողջական դուրսբերման մասին է», - ասել է Պուտինը։
Նշենք, որ Մոսկվա այցելելուց առաջ Հունգարիայի առաջնորդը եղել է Կիևում, որտեղ Վլադիմիր Զելենսկուն առաջարկել է դադարեցնել կրակը՝ երկրում զինված հակամարտության կարգավորման շուրջ Ռուսաստանի հետ բանակցություններ սկսելու համար, սակայն Զելենսկին մերժել է նրա առաջարկը։
Օրբանի մոսկովյան այցի ֆոնին ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը հայտարարել է, որ Հունգարիայի վարչապետը Եվրամիության մանդատը չի ստացել Ռուսաստան այցելելու համար, և այդ այցը տեղի է ունենում բացառապես Հունգարիայի և Ռուսաստանի միջև երկկողմ հարաբերությունների շրջանակում, բայց ոչ որպես Եվրամիության ներկայացուցիչ:
Հունգարիան ԵՄ անդամ պետություն է, որը մինչև 2024 թվականի դեկտեմբերի 31-ը ԵՄ նախագահում է խորհուրդը: