ԵՐԵՎԱՆ, 4 հուլիսի – Sputnik. ՀՀ մարզերի 9 լողավազանի 9.5 մլն դրամ կհատկացվի, որպեսզի երեխաները 4 ամիս անվճար մարզվեն։ Որոշումն ընդունվեց ՀՀ կառավարության այսօրվա նիստի ժամանակ։
Սա փորձնական ծրագիր է, որի արդյունքում մարզային յուրաքանչյուր լողավազանում 22 դպրոցահասակ երեխա 4 ամիս անվճար կլողա։ Յուրաքանչյուր երեխայի համար ՀՀ կառավարությունը կտրամադրի ամսական 12 հազար դրամ։
Ծրագիրը կմեկնարկի այն քաղաքներում, որտեղ կան սպորտային լողավազաններ` Կապան, Էջմիածին, Մեծամոր, Հրազդան, Ապարան, Վանաձոր, Իջևան:
«Յուրաքանչյուր լողավազանում կլինի դպրոցահասակ երեխաների 2 տարիքային խումբ` 1–ին խմբում կընդգրկվեն 8–12 տարեկան երեխաները, 2–րդ խմբում՝ 13–17 տարեկանները: 1–ին խմբում պարապողների առավելագույն քանակը 12–ն է, 2–րդ խմբում՝ 10–ը»,– տեղեկացրեց ՀՀ ԿԳՄՍ նախարար Ժաննա Անդրեասյանը։
ՀՀ վարչապետ Նիկոլ Փաշինյանն իր հերթին նշեց, որ մասնավոր լողավազաններին կհրահանգվի ձևավորել խմբակներ՝ պրոֆեսիոնալ մարզիչով, իսկ կառավարությունը կվճարի ամսավճարը։
«Մեր դառը փորձը ցույց է տալիս, որ ինչ լավ որոշում կայացնում ենք, վերջում դառնում է ոչ թե արդյունք, այլ չարաշահում, քրեական գործ։ Մենք հիմա շատ զգույշ ենք մոտենում այս խնդրին, որովհետև պետք է գործիքներ ունենանք, որ երեխաներն իրոք գնան լողավազան, լող պարապեն, ոչ թե հազարավոր երեխաների ցուցակներ ունենանք, որ իրենք էլ չիմանան, որ լողի չեմպիոն են, և բյուջեից գումարներ գնան այդ կազմակերպություններին»,– հայտարարեց Փաշինյանը։
Ընդհանուր առմամբ, ծրագիրը կվերաբերի մոտ 200 երեխաների, որոնք կկարողանան լողի դասեր անցնել շաբաթական երեք անգամ՝ մեկական ժամով։