ԱԽ քարտուղար Արմեն Գրիգորյանը երեկ «Հայաստան–Արևելյան գործընկերություն–Եվրամիություն. մարտահրավերներ և հնարավորություններ» համաժողովի ժամանակ ազդարարեց նոր ատոմակայանի կառուցման հետ կապված ԱՄՆ–ի հետ առարկայական փուլ մտելու մասին։
Նրա խոսքով` ԱՄՆ–ի հետ այժմ քննարկվում է իրավապայմանագրային դաշտը կարգավորելու հարցը և գնդակը ներկա պահին ԱՄՆ–ի դաշտում է։
Էներգետիկ անվտանգության փորձագետ Արթուր Ավետիսյանը ենթադրում է, որ Արմեն Գրիգորյանի հայտարարությունը ամենայն հավանականությամբ այն մասին է, որ հայաստանյան մասնագետներին պետք է հնարավորություն տրվի առավել մանրամասն ծանոթանալու նոր ատոմակայանի հետ կապված ամերիկյան կողմի առաջարկին։
«Քանի որ մոդուլային ատոմակայանները դեռևս գործնական, կիրառական փուլ չեն մտել, նախագծային ու փորձնական փուլում են, որպեսզի հասկանալի լինի, թե դրանք որքանով են արդյունավետ, պետք է ոչ միայն արտադրող նախագծողների հավաստիացումների, գովազդի մակարդակով ներկայացվեն։ Կարծում եմ խոսքը դրա մասին է, որ հայ մասնագետները կարողանան հողի վրա ծանոթանալ բոլոր փաստաթղթերին, որպեսզի կարողանան եզրահանգման գալ»,–Sputnik Արմենիայի հետ զրույցում ասել է Ավետիսյանը։