ԵՐԵՎԱՆ, 3 հուլիսի – Sputnik. Այնպես, ինչպես Կիևն է արձագանքել Հունգարիայի վարչապետ Վիկտոր Օրբանի` հրադադարի վերաբերյալ առաջարկին, սպասելի էր։ Այս հայտարարությունն արել է ՌԴ ԱԳՆ պաշտոնական ներկայացուցիչ Մարիա Զախարովան։
«Դուք ուրի՞շ բան էիք սպասում լսել։ Խաղաղության մասին բոլոր խոսքերը շիրմա են, կլիշե բառեր, մեմեր, որոնք որպես թեզեր պետք է անգիր անել և արտասանել: Նպատակն էլ մեկն է (այն հնչեցվել է հավաքական Արևմուտքի կողմից)՝ Ռուսաստանին ռազմավարական պարտություն հասցնելը», – ասել է դիվանագետը Sputnik ռադիոկայանի եթերում։
Հուլիսի 2-ին Օրբանը 12 տարվա մեջ առաջին անգամ այցելել է Կիև։ Հուլիսի 1-ից Հունգարիան վեց ամսով նախագահում է Եվրամիության խորհրդում։ Վլադիմիր Զելենսկու հետ ասուլիսի ժամանակ Հունգարիայի վարչապետն ասել է, որ խնդրել է նրան նախքան ուկրաինական իրավիճակի կարգավորման բանակցությունները դիտարկել հրադադարի հնարավորությունը։ Ուկրաինայի նախագահի գրասենյակի ղեկավարի տեղակալ Իգոր Ժովկվան իր հերթին ասել է, որ Կիևը կձգտի հակամարտությունը լուծել այլ մեթոդներով։ Օրբանը նաև ասել է, որ Ուկրաինայում խաղաղության հարցը լինելու է գլխավոր հարցը ԵՄ Խորհրդում Հունգարիայի նախագահության առաջիկա վեց ամիսների ընթացքում։