ԵՐԵՎԱՆ, 1 հուլիսի – Sputnik. Արագածոտնի մարզի Աշտարակ քաղաքում կասեցվել է անհատ ձեռնարկատեր Նարինե Կիրակոսյանին պատկանող «Զատիկ» երեխաների զարգացման կենտրոնի գործունեությունը։ Տեղեկությունը հայտնում է ՀՀ սննդամթերքի անվտանգության տեսչական մարմինը։
Տեսուչները պարզել են, որ կենտրոնի արտադրական գործընթացներն իրականացվում են սահմանված պահանջների խախտմամբ։
Սննդի կառույցները նախագծված, կառուցված ու դասավորված չեն եղել այնպես, որ բացառվեն պարենային հումքի և սննդամթերքի, աղտոտված և մաքուր գույքի հանդիպակաց կամ խաչաձևվող հոսքերը, ապահովված չեն եղել բավարար քանակությամբ բնական և (կամ) արհեստական օդափոխանակությամբ, սանհանգույցը և խոհանոցը գտնվել են նույն վայրում, երեխաների գիշերանոթները գտնվել են խոհանոցի տարածքում, պատերը չեն ունեցել հարթ մակերես, չեն գտնվել նորոգ վիճակում, պատված չեն եղել անջրանցիկ, չներծծող, ախտահանվող նյութերով։
Պարզվել է նաև, որ սննդամթերք պարունակող տարածքների աշխատանքային մակերևույթները՝ ներառյալ սարքավորումների մակերևույթները (հատկապես սննդամթերքի հետ անմիջական շփման մեջ գտնվողները), պատրաստված չեն եղել հարթ, մաքրվող, կոռոզիայի չենթարկվող նյութերից:
Չեն իրականացվել տարածքի միջատազերծման և կրծողների ոչնչացման գործընթացները:
Տեսչական մարմնի ղեկավարի որոշմամբ՝ հայտնաբերված խախտումները վերացնելու համար ժամկետ է սահմանվել։