ԵՐԵՎԱՆ, 26 հունիսի – Sputnik. Երևանի չեմպիոն «Փյունիկի» և Մինսկի «Դինամոյի» հանդիպման վայրը փոխվել է։ Տեղեկությունը հայտնում է «Ֆյունիկ» ֆուտբոլային ակումբը։
«Չեմպիոնների լիգայի որակավորման առաջին փուլի պատասխան հանդիպումը կկայանա ոչ թե «Ուրարտու» ստադիոնում, ինչպես նախապես հայտարարվել էր, այլ Վ. Սարգսյանի անվան Հանրապետական մարզադաշտում»,– ասված է հաղորդագրությունում:
Նշենք, որ հանդիպումը կայանալու է հուլիսի 16-ին` ժամը 20։00-ին։
«Փյունիկ» ակումբի սեփականատեր Արթուր Սողոմոնյանն ավելի վաղ հայտնել էր, որ դեռևս ապրիլին իրենք ՀՖՖ-ից նամակ են ստացել, որտեղ նշվել է, որ չեմպիոն դառնալու դեպքում Չեմպիոնների լիգայի որակավորման փուլի երևանյան հանդիպումը կարող են անցկացնել կա՛մ Արմավիր քաղաքի մարզադաշտում, կա՛մ էլ Գյումրու քաղաքային մարզադաշտում։ Մինչդեռ ակումբը ցանկանում էր, որ իրեն տրամադրեն Երևանի Հանրապետական մարզադաշտը։
Նշենք, որ «Փյունիկի» և ՀՖՖ–ի միջև դիմակայություն սկսվեց, երբ ակումբի սեփականատեր Արթուր Սողոմոնյանը քննադատեց ֆեդերացիայի ղեկավարությանը: Գործը հասավ նրան, որ 2023 թվականի մայիսին ՀՖՖ նախագահ Արմեն Մելիքբեկյանը Արթուր Սողոմոնյանի դեմ հայց ներկայացրեց դատարան։