ԵՐԵՎԱՆ, 28 հունիսի – Sputnik. Հուլիսի 1–ից Հայաստանը կստանձնի Սևծովյան տնտեսական համագործակցության կազմակերպության նախագահությունը։ ՀՀ արտգործնախարարի տեղակալ Վահան Կոստանյանը առցանց ձևաչափով մասնակցել և ելույթ է ունեցել Սևծովյան տնտեսական համագործակցության կազմակերպության (ՍԾՏՀԿ) արտաքին գործերի նախարարների խորհրդի 48-րդ նիստում: Կոստանյանը ներկայացրել է ՍԾՏՀԿ-ում ՀՀ նախագահության գերակայությունները:
Այս համատեքստում Կոստանյանն ընդգծել է, որ առկա է ՍԾՏՀ անդամ մի քանի երկրների հետ արտաքին առևտրաշրջանառության զգալի աճ։
Նա ընդգծել է, որ Հայաստանը, լիովին հավատարիմ լինելով Հարավային Կովկասում կայուն խաղաղության հաստատմանը, Արևելքի ու Արևմուտքի, Հարավի ու Հյուսիսի միջև առևտրային և տրանսպորտային կապերի առաջմղման միջոցով տնտեսական և մշակութային փոխանակումների խթանմանը, ներկայացրել է «Խաղաղության խաչմերուկ» նախաձեռնությունը։
«Որպես մեր խաղաղության օրակարգի մաս՝ այս նախագիծը նպատակ ունի զարգացնել հաղորդակցությունը տարածաշրջանի երկրների միջև՝ վերանորոգելով, կառուցելով և շահագործելով ճանապարհներ, երկաթուղիներ, խողովակաշարեր, մալուխներ և էլեկտրական գծեր՝ այդպիսով բացելով նոր հնարավորություններ բեռների, ապրանքների և քաղաքացիների տեղաշարժի համար, և զգալիորեն ընդլայնելով մեր տարածաշրջանի ինտեգրումը համաշխարհային տրանսպորտային ցանցերին»,–նշել է նա:
Նա շեշտել է, որ «Խաղաղության խաչմերուկ» նախաձեռնությունը կարող է հսկայական օգուտներ բերել Սևծովյան տարածաշրջանի բոլոր երկրներին։
Հավելենք, որ հանդիպման արդյունքում ընդունվել են մի շարք բանաձևեր և որոշումներ: