ԵՐԵՎԱՆ, 27 հունիսի – Sputnik. «Տավուշը հանուն հայրենիքի» շարժումը հուլիսի 3-ին պատրաստվում է հանդիպման հրավիրել քաղաքական դաշտի բոլոր ուժերին, իսկ դրանից առաջ կմեկնեն Սյունիքի մարզ։ Այս մասին լրագրողների հետ զրույցում ասաց շարժման առաջնորդ Բագրատ սրբազանը։
Նշենք, որ այս պահին Սուրբ Աննա եկեղեցու բակում մեկնարկել է «Տավուշը հանուն հայրենիքի» շարժման հավաքը:
«Հանդիպման կկանչենք նրանց, որոնք ի սկզբանե եղել են (նկատի ունի շարժման կողքին գտնվող կուսակցություններին – խմբ.)։ Հավանաբար այդ ուժերով քաղաքական մեծ կամ փոքր խորհուրդ կկազմվի, ձևաչափը կորոշենք։ Դա արվելու է, որպեսզի ներգրավվածության աստիճանը մեծանա»,– նշեց «Տավուշը հանուն հայրենիքի» շարժման առաջնորդ Բագրատ սրբազանը։
Նա ընդգծեց, որ հունիսի 28-ին էլ պատրաստվում են գնալ Մեղրի, հետո Կապան, Գորիս, Սիսիան, ինչպես նաև Խուստուփ բարձրանալ։
«Գնալու եմ գյուղ առ գյուղ, քաղաք առ քաղաք, մարդկանց եմ հանդիպելու։ Առաջինը Սյունիք ենք գնալու, որովհետև այն խոցելի է, երկրորդն էլ՝ չեմ կարծում, որ տեղեկատվական առումով ամեն ինչ ճիշտ է տեղ հասնում։ Ժողովրդի հետ կխոսենք, խնդիրները կվերհանենք։ Իրավիճակը կփորձենք ավելի շոշափելի տեսնել այնտեղ»,– ասաց սրբազանը։
Հարցին՝ արդյոք մեծ հանրահավաք նախատեսված է, սրբազանը չբացառեց, ընդգծեց, որ ամեն ինչ էլ հնարավոր է։