Հունիսն ուղեկցվում է եղանակային վայրիվերումներով, անձրև, կարկուտ, սաստիկ շոգ ու քամի։ «Հիդրոօդերևութաբանության ու մոնիտորինգի կենտրոնը տեղեկացնում է, որ Սև ծովի շրջաններից ցուրտ մթնոլորտային ճակատի ներթափանցման պատճառով այսօր երեկոյան ժամերին և հունիսի լույս 27-ի գիշերը հանրապետության ամբողջ տարածքում սպասվում է անձրև և ամպրոպ, առանձին հատվածներում կտեղա կարկուտ։
Ներքին գործերի նախարարության Փրկարար ծառայությունում էլ երեկ անցկացվել է անտառներում և բուսածածկ տարածքներում հնարավոր հրդեհավտանգ իրավիճակների մշտադիտարկման, հրդեհների կանխարգելման, արագ արձագանքման, հրդեհների դեմ պայքարի, դրանց տարածման, ինչպես նաև դրանց հետևանքների վերացմանն ուղղված միջոցառումների իրականացման նպատակով վարչապետի որոշմամբ ստեղծված աշխատանքային խմբի նիստ։
Պատկան գերատեսչություններին առաջարկվել է անցկացնել «Անտառային և բուսածածկ տարածքների հրդեհների մարումը» թեմայով համատեղ ուսումնավարժություններ, ինչն, ըստ մասնագետների, հնարավորություն կտա իրական դեպքերի ժամանակ ապահովել արդյունավետ փոխգործակցություն։
Առաջիկա օրերի եղանակային կանխատեսումների մասին Sputnik Արմենիան զրուցել է «Հիդրոօդերևութաբանության ու մոնիտորինգի կենտրոնի տնօրենի տեղակալ Գագիկ Սուրենյանի հետ։ Նրա խոսքով` հունիսի տեղումնառատ եղանակը կապված չէ համաշխարհային կլիմայական փոփոխությունների հետ։ Սուրենյանը խորհուրդ է տալիս քաղաքացիներին` առաջիկա հանգստյան օրերն անցկացնել տանը։