ԵՐԵՎԱՆ, 21 հունիսի – Sputnik. ՀԱՊԿ երկրների արտաքին գործերի նախարարները պայմանավորվել են աշխատել Եվրասիական անվտանգության նոր ճարտարապետության ձևավորման ուղղությամբ: Այս մասին հայտարարել է ՌԴ արտգործնախարար Սերգեյ Լավրովը ՀԱՊԿ արտգործնախարարների խորհրդի նիստից հետո։
«Մեր քննարկումներում հատուկ ուշադրություն ենք դարձրել եվրասիական անվտանգության ճարտարապետության ձևավորմանը իրենց վարկաբեկած եվրատլանտյան սխեմաների փոխարեն», - նշել է Լավրովը:
Նա ավելացրել է, որ ՀԱՊԿ երկրների արտգործնախարարները պայմանավորվել են այդ թեման զարգացնել վերլուծական ստորաբաժանումներում և կանոնավոր խորհրդակցություններ անցկացնել կազմակերպության շրջանակում:
ՌԴ արտգործնախարարի կարծիքով՝ ՆԱՏՕ-ն կխոչընդոտի եվրասիական անվտանգության կառույցի ձևավորման գործընթացներին, քանի որ ուզում է միանձնյա լուծել Եվրասիայում կայունության հարցերը:
«Սպառնալիքները, որոնք ի հայտ են գալիս եվրասիական անվտանգության համար, գալիս են տարբեր ուղղություններից, բայց դեպքերի ճնշող մեծամասնությունում այդ սպառնալիքների աղբյուրը ՆԱՏՕ-ի ագրեսիվ գիծն է, որը ցանկանում է սեփականաշնորհել, իր տակ առնել մեր հսկայական տարածքում կայունության ապահովման հետ կապված բոլոր հարցերը», - ասել է նա:
Անդրադառնալով Ուկրաինայում Արևմուտքի կողմից հրահրված հակամարտությանը՝ Լավրովը նշել է, որ Կիևի ռեժիմի օգտագործումը, որպես Ռուսաստանի դեմ ագրեսիայի գործիք, լուրջ սպառնալիք է ներկայացնում նաև ՀԱՊԿ անդամ երկրների համար:
Բացի այդ, ՌԴ արտգործնախարարն ընդգծել է, որ ՀԱՊԿ երկրները միասնական են ահաբեկչության դեմ պայքարի հարցերով Աֆղանստանի իշխանության հետ երկխոսություն հաստատելու անհրաժեշտության հարցում:
«Աֆղանստանի տարածքում շարունակում են գործել ԻԼԻՊ-ի և «Ալ-Քաիդայի» բջիջները, և թալիբների կառավարությունը պայքարում է նրանց դեմ։ Մենք կարևորում ենք այդ պայքարին աջակցություն ցուցաբերելը», - նշել է Լավրովը։
Նա նաև ավելացրել է, որ Մերձավոր Արևելքի և Հյուսիսային Աֆրիկայի տարածաշրջանում սպառնալիքները կապված են հակամարտությունների (այդ թվում՝ պաղեստինա-իսրայելական) կարգավորված չլինելու հետ: Այս գործընթացներն ազդում են հարևան տարածքների վրա՝ նպաստելով ահաբեկիչների տեղափոխմանը Եվրոպա, Կենտրոնական Ասիա և Կովկաս։
* Ռուսաստանի տարածքում արգելված ահաբեկչական կազմակերպություններ