ԵՐԵՎԱՆ, 21 հունիսի – Sputnik. ԵՄ անդամակցության հանրաքվեն առաջարկում են անցկացնել սեպտեմբերի 21–ին։ Նման հայտարարությամբ այսօր ՀՀ ԱԺ–ում հանդես եկավ «Հանրապետություն» կուսակցության նախագահ Արամ Սարգսյանը։
ԱԺ–ում ՀՀ-ի` ԵՄ-ին անդամակցության հայտ ներկայացնելու հարցը հանրաքվեի դնելու մասին լսումներ են։ Լսումները նախաձեռնել են արտախորհրդարանական 4 ուժ` «Հանուն հանրապետության» կուսակցությունը, «Հայաստանի եվրոպական կուսակցությունը», Հանրապետություն» կուսակցությունը, «Ազատ քաղաքացի» ՀԿ–ն, որոնք միավորվել են «ժողովրդավարական ուժերի հարթակում»։
«ԵՄ անդամակցության վերաբերյալ հանրաքվեն պետք է անցկացնել հենց սեպտեմբերի 21–ին, ինչպես եղավ 1991 թ.։ Խնդիրը սիմվոլիզմը չէ, թեև կարող է լինել, այլ դա կնշանակի այն, որ մենք կշարունակենք այն գործը, որ սկսել է մեր ընկեր Ազատ Արշակյանը։ Դա նաև կնշանակի, որ մենք այս տարածաշրջանում ջանում ենք դառնալ ժողովրդավարության կղզյակ։ Մեզ կսկսեն օժանդակել, ու ես կասկած չունեմ, որ դա շատ առատաձեռն մեզ կփոխհատուցվի»,– հայտարարեց Սարգսյանը, որի ելույթին հաջորդեց դահլիճի բուռն ծափողջույնը։
«Ազատ քաղաքացի» ՀԿ նախագահ Հովսեփ Խուրշուդյանն իր հերթին հիշեցրեց, որ հանրաքվեն պետք է կազմակերպել ու անցկացնել առաջիկա 4 ամսվա ընթացքում։
Լսումների նախաձեռնողներից «Հանուն հանրապետության» կուսակցության նախագահ Արման Բաբաջանյանն էլ իր ելույթում հայտարարեց, որ հանրաքվեի արդյունքները պետք է տեղ գտնեն նաև 2026 թ. սահմանադրական փոփոխությունների մեջ, որոնք ըստ ամենայնի, պետք է տեղի ունենան։
«Հանրաքվեն ահռելի պատուհաններ կբացի մեզ համար` ազատությունների, ժողովրդավարական ինստիտուտների, կոռուպցիայի դեմ պայքարի իմաստներով»,– վստահեցրեց նա։
Այնուհետև նա որոշեց ՀՀ ԱԺ ամբիոնին փռել ԵՄ դրոշը, ինչպես նաև Բաբաջանյանն իր հետ բերել էր «կալոշ»՝ իբր «հետընթացի խորհրդանիշ»։
Ակցիան շփոթեցրեց և բարկացրեց անգամ ԱԺ եվրաինտեգրման հանձնաժողովի նախագահ, լսումները նախագահող Արման Եղոյանին։ Նա Բաբաջանյանին հորդորեց հանել դրոշը` նշելով, որ ինքը դեմ չէ ԵՄ դրոշին ընդհանուր առմամբ, բայց Հայաստանի խորհրդարանում պետք է լինի միայն մեկ դրոշ՝ ՀՀ դրոշը։