Հունիսի 18-ին վարչապետ Նիկոլ Փաշինյանը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ։ Փաշինյանը շնորհավորել է Թուրքիայի նախագահին Կուրբան Բայրամի առթիվ, Էրդողանն էլ շնորհավորել է Հայաստանի վարչապետին գալիք Վարդավառի՝ Հիսուս Քրիստոսի Պայծառակերպության տոնի առթիվ։
Ի դեպ, Փաշինյանը և Էրդողանը նույնաբովանդակ շնորհավորանքներ էին փոխանակել նաև անցած տարի։ Երկու երկրների ղեկավարներն ընդգծել են առանց որևէ նախապայմանի, Երևանի և Անկարայի հարաբերությունների ամբողջական կարգավորման վերաբերյալ` իրենց քաղաքական կամքը։ Այդ համատեքստում Փաշինյանը և Էրդողանը շեշտել են երկու երկրների հատուկ ներկայացուցիչների հանդիպումների շարունակականության կարևորությունը և վերահաստատել են մինչ այժմ ձեռք բերված պայմանավորվածությունները։
Նկատենք, որ հայ-թուրքական բանակցություններում հատուկ բանագնացներ` Ազգային ժողովի փոխնախագահ Ռուբեն Ռուբինյանն ու դեսպան Սերդար Քըլըչը վերջին անգամ հանդիպել են անցած տարի Անթալիայում։ Քըլըչն առաջարկել էր հաջորդ հանդիպումն անցկացնել Երևանում։
Շաբաթներ առաջ էլ Ռուբինյանը տարակուսել էր, որ հայկական կողմից Մարգարա անցակետում կատարված են ենթակառուցվածքային բոլոր աշխատանքները և անցակետը պատրաստ է գործունեության համար, սակայն թուրքական կողմից չեն տեսել քայլեր այդ պայմանավորվածության իրագործման ուղղությամբ։
«Հայ-թուրքական հարաբերություններում օրակարգը թելադրում է Թուրքիան»,-Sputnik Արմենիայի հետ զրույցում կարծիք է հայտնել թուրքագետ Մհեր Աբրահամյանը։