Արժեքները ոտնահարելու հերթական քայլն է կատարվում․Sputnik Արմենիայի եթերում ասել է հոգեբան Կարինե Նալչաջյան՝ մեկնաբանելով երիտասարդ սերնդին ուղղված վարչապետ Փաշիյանի վերջին հայտարարությունները։
«Այդպես հեշտ չէ, երեխաներին պոկել իրենց արժեքներից, թեև դա մի տեսակ խռովարարների տարիք է։ Ես հույս ունեմ, որ այն, ինչ մեզ մատուցվում է, ընդամենը շինծու տեսարան է, և երեխաները, երբ վերադառնան իրենց տները, ընտանիքները, կվերադառնան նաև իրենց արժեքներին»,- ասել է հոգեբանը։
Սյունիք այցի ընթացքում վարչապետ Նիկոլ Փաշինյանը տարբեր ձևաչափերով հանդիպումներ է ունեցել նաև մարզի երիտասարդների ու երեխաների հետ։
Հանդիպումներից մեկում Փաշինյանը դժգոհել է, որ ուր գնում է, ասում են` եկեք խաչքար դնենք։
«Ինչքա՞ն խաչքար դնենք։ Հասկացանք` մեկ, երկու, տաս, հիսուն, հարյուր։ Եկեք ամենքի վզից էլ մի հատ խաչքար կապենք, ասենք` քարշ տվեք, էրեխեք։ Սա ձեր առաքելությունն է», –ասել էր վարչապետը։
Սիսիանի ավագ դպրոցի աշակերտների հետ հանդիպմանը Փաշինյանն ասել էր. «մեր նահատակները զոհվել են, որ այս երեխաններն ազատ ապրեն, որ կյանքը վայելեն, որ կյանքից հաճույք ստանալն ամոթ չլինի, և այս փոփոխությունն է այսօր տեղի ունենում Հայաստանում»։