ԵՐԵՎԱՆ, 18 հունիսի – Sputnik. Եվրասիական տնտեսական միության երկրներն ավարտել են ԵԱՏՄ պետությունների ավտոմոբիլային ճանապարհներով երթևեկելիս տրանսպորտային միջոցների թույլատրելի զանգվածների, բեռնվածության և չափերի մասին համաձայնագրի նախագծի շուրջ համաձայնեցման ներպետական ընթացակարգերը:
«Համաձայնագրի իրականացումը զգալի խթան կդառնա ինչպես եվրասիական տրանսպորտային միջանցքների զարգացման, այնպես էլ առհասարակ ԵԱՏՄ-ի տարանցիկ ներուժի մեծացման համար»,- Եվրասիական տնտեսական հանձնաժողովի էներգետիկայի և ենթակառուցվածքների նախարար Արզիբեկ Կոժոշևի խոսքը մեջբերում է ԵՏՀ մամուլի ծառայությունը։
ԵԱՏՄ ներքին շուկայում առևտրի սահմանափակումներից մեկը միության տարբեր երկրներում տրանսպորտային միջոցների զանգվածին և չափին ներկայացվող ոչ միանման պահանջներն էին։ Համաձայնագիրը թույլ կտա վերացնել այս խնդիրը։
Փաստաթղթի նախագծում ամրագրված են կողմերի պայմանավորվածությունները միջոցներ ձեռնարկելու մասին, որպեսզի եվրասիական տրանսպորտային միջանցքներում ներառված ավտոմոբիլային ճանապարհները լիովին բավարարեն տրանսպորտի անցման պահանջները:
Նշենք, որ ԵԱՏՄ երկրներում բեռնափոխադրումների ընդհանուր ծավալի ավելի քան կեսը բաժին է ընկնում ավտոմոբիլային տրանսպորտին։ Համաձայնագրի գործողության մեկնարկի համար անհրաժեշտ է, որ եվրասիական «հնգյակի» երկրները կառավարությունների մակարդակով փաստաթուղթ ստորագրեն։ Միության պետությունների փոխվարչապետների կողմից ստորագրման ընթացակարգը նախատեսված է ընթացիկ տարվա երրորդ եռամսյակում: