ԵՐԵՎԱՆ, 17 հունիսի – Sputnik. ՀՀ ԱԺ «Քաղաքացիական պայմանագիր» խմբակցությունը «Կառավարության հրաժարականի և նոր կառավարություն ձևավորելու անհրաժեշտության մասին» հարցը քննարկելու համար նախաձեռնված արտահերթ նիստին մասնակցելու անհրաժեշտություն չի տեսնում։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը։
Ավելի վաղ հայտնել էինք, որ արտահերթ նիստը չկայացավ, քանի որ ԱԺ–ում քաղաքական մեծամասնություն կազմող «Քաղաքացիական պայմանագիր» խմբակցության պատգամավորները չէին ներկայացել։ ԱԺ 107 պատգամավորից գրանցվել էր 34 պատգամավոր այն դեպքում, երբ քվորում ապահովելու համար պետք է գրանցվեին նվազագույնը 54–ը։ Գրանցումը շարունակվում է մինչև անհրաժեշտ թվով պատգամավորների գրանցումը, բայց ոչ ավելի, քան 4 ժամ։
«Ինչի՞ պիտի մենք ուղերձ ընդունեինք, ինչի՞ համար։ Մեր ժողովուրդը ՀՀ գործող վարչապետին և կառավարությանը վստահում է, և նման հարց քննարկելու որևէ պատճառ մենք չենք ունեցել և չունենք։ Էլ չեմ ասում, որ ՔՊ թե՛ վարչապետի թեկնածուն, թե՛ կառավարության կազմն իր ժողովրդի կողմից աջակցություն ունի։ Մենք ձևական բաներով չենք զբաղվում։ Իրենց մոտ ի՞նչն է նորմալ. «Վազգեն Մանուկյան-2» արեցին։ Նկատի ունեմ, որ Մանուկյանի փոխարեն Բագրատ Գալստանյանին բերեցին։ Բացի նրանից ի՞նչն է փոխվել` դերակատարնե՞րը, թե՞ պահանջները։ Տեսնենք` հաջորդ տարի ում են բերելու»,– նշեց Ալեն Սիմոնյանը։
ԱԺ նախագահը վստահեցրեց` ամեն տարի նույն պահանջն է ներկայացվում, և իրենք չեն պատրաստվում օրակարգ փոխել։
Հիշեցնենք` «Կառավարության հրաժարականի և նոր կառավարություն ձևավորելու անհրաժեշտության մասին» նախագիծը ներկայացրել են ընդդիմադիր «Պատիվ ունեմ» և «Հայաստան» խմբակցությունները։