ԵՐԵՎԱՆ, 17 հունիսի – Sputnik. ՀՀ ԱԺ «Կառավարության հրաժարականի և նոր կառավարություն ձևավորելու անհրաժեշտության մասին» հարցը քննարկելու համար նախաձեռնված արտահերթ նիստին ՔՊ–ի կողմից քվորում չապահովելը սահմանադրական կարգի տապալման փորձ է։ Այս մասին լրագրողների հետ զրույցում ասաց «Հայաստան» խմբակցության քարտուղար Արծվիկ Մինասյանը։
Ավելի վաղ հայտնել էինք, որ արտահերթ նիստը չկայացավ, քանի որ ԱԺ–ում քաղաքական մեծամասնություն կազմող «Քաղաքացիական պայմանագիր» խմբակցության պատգամավորները չէին ներկայացել։ 107 պատգամավորից գրանցվել էին 34–ը (քվորում ապահովելու համար պետք է գրանցվեին նվազագույնը 54–ը)։
Ընդդիմադիր պատգամավորը հայտարարեց` Սահմանադրությունը պարտավորեցնում է պատգամավորներին ապահովել խորհրդարանի բնականոն աշխատանքը:
«Սահմանադրության 100-րդ հոդվածը սահմանում է, որ պատգամավորների առնվազն ¼-ի հրավիրած նիստը պետք է կայանա։ Խորհրդարանական մեծամասնությունը չի կարող տապալել խորհրդարանի նիստերը՝ օգտվելով իր քանակական առավելությունից։ Ըստ կանոնակարգ օրենքի` եթե 4 ժամվա ընթացքում ՔՊ–ն չգա և 54 պատգամավորի ներկայություն չապահովվի, հետևաբար արտահերթ նիստի օրակարգը համարվում է ավարտված։ Քանի որ այս նախաձեռնությունը գտնվում է ԱԺ–ի ընթացիկ շրջանառության մեջ, հետևաբար շարունակում է լինել օրակարգային հարց։ Առաջիկա հերթական նիստի օրակարգից առաջ այն ենթակա է քննարկման նախ հանձնաժողովում, ապա նաև ԱԺ հերթական նիստին»,– ասաց Մինասյանը։
Հիշեցնենք` ԱԺ նախագահ Ալեն Սիմոնյանը հայտարարել է, որ «Քաղաքացիական պայմանագիր» խմբակցությունը «Կառավարության հրաժարականի և նոր կառավարություն ձևավորելու անհրաժեշտության մասին» հարցը քննարկելու համար նախաձեռնված արտահերթ նիստին մասնակցելու անհրաժեշտություն չի տեսնում։