ԵՐԵՎԱՆ, 15 հունիսի – Sputnik. Երևանում կայացել է Հայկական ԱԷԿ-ի շահագործման ժամկետի երկարաձգման համակարգող կոմիտեի առաջին նիստը, որը կազմակերպել են Հայաստանի իշխանությունները և «Ռոսատոմ» պետական կորպորացիայի ներկայացուցիչները։
«Հանդիպումը տեղի է ունեցել հունիսի 13–ին»,– Sputnik Արմենիային հայտնեց Հայաստանում «Ռուսատոմ-միջազգային ցանց»–ի ներկայացուցչության տնօրեն Միխայիլ Տուրունդաևը։
Կոմիտեն գլխավորել են «Ռոսատոմի» ղեկավարի առաջին տեղակալ Կիրիլ Կոմարովը և ՀՀ տարածքային կառավարման և ենթակառուցվածքների փոխնախարար Հակոբ Վարդանյանը:
Տուրունդաևը նշեց, որ 2023 թվականի դեկտեմբերին «Ռոսատոմը» Հայկական ԱԷԿ-ի հետ շրջանակային համաձայնագիր է ստորագրել կայանի երկրորդ էներգաբլոկի շահագործման ժամկետի երկրորդ երկարաձգման մասին։ Սկսվել են աշխատանքային քննարկումները և անհրաժեշտ աշխատանքների իրականացման համար պայմանագրերի կնքման նախապատրաստական աշխատանքները, որոնք նախատեսվում է իրականացնել մի քանի տարվա ընթացքում: Կարևոր է պահպանել ժամկետները, որպեսզի գործող էներգաբլոկը շարունակի աշխատանքը առանց դադարների։
Հունիսի 13-ին Կոմարովը հանդիպել է նաև ՀՀ փոխվարչապետ Մհեր Գրիգորյանի հետ` նրան տեղեկացնելով նիստի ընթացքի մասին և քննարկելով նոր կայանի կառուցման հարցերը: Տուրունդաևն ընդգծեց, որ «Ռոսատոմը» նոր կայանի մի քանի տարբերակ է առաջարկել, իսկ գործող բլոկի շահագործման ժամկետի երկարաձգումը կիրականացվի սահմանված ժամկետներում:
Հիշեցնենք, որ նմանատիպ համակարգող կոմիտե է աշխատել նաև կայանի ծառայության ժամկետի առաջին երկարացման ժամանակ։ Հայկական ԱԷԿ-ի երկրորդ էներգաբլոկը, որը գործարկվել է 1980 թվականին, ի սկզբանե ունեցել է 30 տարվա ժամկետ։ 1989-1995 թվականներին կայանը եղել է երկարատև կանգառի ռեժիմում, և ծառայության ժամկետը երկարացվել է 2010 թվականից մինչև 2016 թվականը։ Այնուհետև աշխատանքներ են տարվել ծառայության ժամկետը մինչև 2026 թվականը երկարացնելու ուղղությամբ։ Այժմ նախատեսվում է երկարաձգել մինչև 2036 թվականը։
Մինչ այդ ժամկետի լրանալը իշխանությունները պատրաստվում են ընտրել նոր կայանի նախագիծ և կառուցել այն։ Դրա համար ուսումնասիրվում են առաջարկներ Ռուսաստանից, ԱՄՆ-ից, Ֆրանսիայից և Հարավային Կորեայից։