ԵՐԵՎԱՆ, 14 հունիսի – Sputnik. Արցախի նախկին պետնախարար Ռուբեն Վարդանյանի փաստաբանների միջազգային խումբը հրատապ դիմում է հղել ՄԱԿ-ի խոշտանգումների հարցով հատուկ զեկուցողին` խնդրելով դատապարտել Ռուբեն Վարդանյանի նկատմամբ Ադրբեջանի կառավարության դաժան վերաբերմունքը։ Տեղեկությունը հայտնում է նրա ընտանիքը։
Փաստաբանները հիշեցրել են, որ 2024 թվականի ապրիլի 5-25-ը Վարդանյանը հացադուլ է արել` բողոքելով իր և մյուս հայ գերիների ապօրինի ձերբակալման և քաղաքական դրդապատճառներով հետապնդման դեմ։ Ի պատասխան` Ադրբեջանի պետական անվտանգության ծառայության մեկուսարանի վարչակազմը, որտեղ այժմ պահվում է Վարդանյանը, նրան տեղափոխել է պատժախուց և ամբողջ հացադուլի ընթացքում պահել այնտեղ։
«Պատժախցում 24 ժամ շարունակ լույս է վառվել, ինչը հանգեցրել է հյուծվածության և առողջական այլ խնդիրների։ Բացի այդ, Ռուբենին երկար ժամանակ ստիպել են կանգնել, ավելի քան 2 օր զրկել են ջրից։ Թույլ չեն տվել լվացվել, փոխել սպիտակեղենը և հագուստը, զուգարանի թուղթ չեն տվել, թույլ չեն տվել նաև գրել և կարդալ։ Այս սարսափելի պատկերը լրացնում է այն փաստը, որ հացադուլի ժամանակ ոչ ոքի թույլ չեն տվել մտնել Ռուբենի մոտ` ո՛չ նրա փաստաբանին, ո՛չ էլ Ադրբեջանի մարդու իրավունքների պաշտպանին։ Կտրել են կապը արտաքին աշխարհի հետ. նա չի կարողացել նաև հեռախոսով խոսել հարազատների հետ»,– նշել են իրավաբանները։
Հիշեցնենք` ադրբեջանցի սահմանապահները 2023 թվականի սեպտեմբերի վերջին ձերբակալեցին Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին։