ԵՐԵՎԱՆ, 14 հունիսի – Sputnik. Գերմանիան այս տարի Եվրահանձնաժողովի նախագահի պաշտոնում կրկին կառաջադրի Ուրսուլա ֆոն դեր Լյայենի թեկնածությունը։ Այս մասին հայտնում է Reuters-ը՝ հղում անելով Գերմանիայի կառավարության աղբյուրներին։
«Գերմանիայի կանցլեր Օլաֆ Շոլցի կառավարությունը հունիսի 17–ին ԵՄ առաջնորդների հանդիպման ժամանակ Ուրսուլա ֆոն դեր Լյայենին կառաջադրի Եվրահանձնաժողովի նախագահի պաշտոնում երկրորդ ժամկետով»,- գրում է Reuters-ը։
ԵՄ առաջնորդները կհավաքվեն Բրյուսելում` ամփոփելու Եվրախորհրդարանի ընտրությունների արդյունքները և քննարկելու բարձր պաշտոնների վերաբերյալ ոչ պաշտոնական որոշումները:
65-ամյա Ուրսուլա ֆոն դեր Լյայենը Եվրահանձնաժողովը ղեկավարում է 2019 թվականից և առաջին կինն է, որը զբաղեցնում է այդ պաշտոնը։ Նա նախկինում եղել է Գերմանիայի ընտանիքի նախարար և պաշտպանության նախարար: Եվրահանձնաժողովի նախագահի պաշտոնում նրա առաջին ժամկետն ավարտվում է այս տարի։