ԵՐԵՎԱՆ, 13 հունիսի - Sputnik. Հայաստանի իշխանությունների որդեգրած ընդգծված հակառուսական կեցվածքը միայն ավելացնում է ՀՀ–ի սպառնալիքների շրջանակը։ Sputnik Արմենիայի հետ զրույցում նման տեսակետ հայտնեց ՀՀ նախկին արտգործնախարար Արա Այվազյանը` անդրադառնալով հայ-ռուսական հարաբերություններին։
Արա Այվազյան
© Sputnik / Andranik Ghazaryan
Նախկին արտգործնախարարը նշեց` ինչպես հավերժական թշնամիներ չեն լինում, դաշնակիցները ևս հավերժական չեն լինում, շահերի փոփոխություններ են լինում, և պետք է կարողանալ այդ շահերը համադրել։
Իր փորձից ելնելով` Այվազյանը համոզմունք հայտնեց, որ պետք է և կարելի է շարունակել երկխոսել Ռուսաստանի Դաշնության հետ։
«Մեծ տերություններն իրենք էլ են շատ անգամ սխալվում, բայց այդ սխալներն այդքան ցավագին չեն իրենց վրա անդրադառնում, ինչպես փոքր երկրների վրա։ Ես կարծում եմ` ռազմավարական հեռանկարների մասով պետք է շատ լուրջ, հետևողական և համբերատար աշխատանք տանել ՌԴ–ի հետ»,–ասաց Այվազյանը։
Նա նաև ընդգծեց, որ Հայաստանում օբյեկտիվ հիասթափություն կա ՌԴ կեցվածքից, բայց այնուհանդերձ նկատեց, որ Ռուսաստանում և՛ ակադեմիական շրջանակներում, և՛ մասնագիտական շրջանակներում արթնանում է այն մտահոգությունը, որ իրավիճակը կարող է անդառնալիության հասնել։ Իսկ անդառնալիության կետին չհասնելու համար, Այվազյանի համոզմամբ, շատ վճռական կամք է անհրաժեշտ։
«Որոշ շրջանակներ այժմեական ինչ–որ խնդիրների լուծումը, որոնք ունեն տակտիկական բնույթ, շփոթում են ստրատեգիական հեռահար նպատակների հետ»,–հավելեց նա։
Վերջին շրջանում փորձագետները հայտնում են հայ–ռուսական հարաբերությունների շարունակական վատթարացման մասին։ Մասնավորապես, Հայաստանը չի մասնակցում ՀԱՊԿ զորավարժություններին, հրաժարվել է այդ կազմակերպության գլխավոր քարտուղարի տեղակալի քվոտայից։ Այս ամենը երբեմն ուղեկցվում է փոխադարձ մեղադրանքներով և դիվանագիտական նոտաներով։
Այդ հարաբերություններում լրացուցիչ լարվածություն է մտցրել վարչապետ Նիկոլ Փաշինյանի վերջերս արած հայտարարությունն այն մասին, թե ՀԱՊԿ առնվազն 2 երկիր օգնել են Ադրբեջանին Լեռնային Ղարաբաղում 44-օրյա պատերազմի ժամանակ։ Այդ մասին նա ասել է` մեկնաբանելով Ադրբեջան կատարած այցի ընթացքում Բելառուսի նախագահի հնչեղ հայտարարությունները։ Լուկաշենկոն, դիմելով Ալիևին, մարտական գործողություններն անվանել էր «ազատագրական պատերազմ»: