ԵՐԵՎԱՆ, 11 հունիսի – Sputnik. Հայաստանն ու Ֆրանսիան պաշտպանական ոլորտի համագործակցությունը զարգացնելու հարցեր են քննարկել։ Տեղեկությունը հայտնում է ՀՀ պաշտպանության նախարարությունը։
Նշվում է, որ ՀՀ պաշտպանության նախարարի առաջին տեղակալ, ԶՈւ գլխավոր շտաբի պետ, գեներալ-լեյտենանտ Էդվարդ Ասրյանի ու Ֆրանսիայի ցամաքային զորքերի հրամանատար, գեներալ Պիեր Շիլլի հանդիպումը կայացել է Գերմանիայում ընթացող Եվրոպայի ցամաքային զորքերի հրամանատարների համաժողովի շրջանակում։
«Քննարկվել են համագործակցության հետագա զարգացմանն առնչվող հարցեր, մասնավորապես՝ փորձի փոխանակման և անձնակազմի պատրաստության ուղղություններով»,– ասված է հաղորդագրությունում։
Նշվում է, որ հանդիպման ընթացքում ձեռք են բերվել պայմանավորվածություններ՝ համագործակցությունն առավել զարգացնելու ուղղությամբ։
Հիշեցնենք` փետրվարի 23-ին Ֆրանսիայի ԶՈւ նախարար Սեբաստիեն Լըկորնյուի հայաստանյան այցի ընթացքում փաստաթուղթ ստորագրվեց երկու երկրների միջև ռազմատեխնիկական համագործակցությունը զարգացնելու մասին։ Նմանատիպ համաձայնագրեր էին կնքվել 2023 թվականի հոկտեմբերին ՀՀ պաշտպանության նախարար Սուրեն Պապիկյանի փարիզյան այցի ժամանակ։ Փոխգործակցության շրջանակում Հայաստանը ստանում է «Ground Master» (GM200) ռադարներ և գիշերային տեսանելիության սարքեր։ Ֆրանսիան նախորդ տարի Հայաստան է մատակարարել նաև «Bastion» տիպի 24 զրահափոխադրիչ, ևս 26-ը արտադրման փուլում են։