Սահմանադրության փոփոխության պահանջով Ադրբեջանը հավելյալ զիջումներ է կորզում ՀՀ–ից. Sputnik Արմենիայի եթերում ասել է սահմանադրագետ Վարդան Պողոսյանը` մեկնաբանելով վերջին օրերին ՀՀ–ից ու Ադրբեջանից հնչող հայտարարությունները։
Հիշեցնենք` ԱԳ նախարար Արարատ Միրզոյանն անցած շաբաթ խորհրդարանում հայտարարել էր, որ և՛ Ադրբեջանը, և՛ Հայաստանը միմյանց սահմանադրություններում խնդիրներ տեսնում են, բայց երկարատև խաղաղության հաստատման համար այդ փաստն իրավական առումով խնդիր չի կարող դառնալ, և սահմանադրական փոփոխության հարցը բանակցությունների առարկա չէ։
Միրզոյանի հայտարարությանն արձագանքեց Ադրբեջանի ԱԳ նախարար Ջեյհուն Բայրամովը` «անընդունելի» որակելով երկու երկրների սահմանադրությունների միջև զուգահեռներ անցկացնելու փորձը:
Ալիևն իր հայտարարության մեջ ավելի հեռուն գնաց` ասելով, որ Երևանի ու Բաքվի միջև խաղաղության պայմանագրի կնքումն անհնար է առանց ՀՀ Սահմանադրության փոփոխության։
Իլհամ Ալիևի հայտարարությանն իր հերթին արձագանքեց ՀՀ ԱԳՆ–ը` նշելով, որ Սահմանադրությունն ու դրա փոփոխությունները ՀՀ ներքին գործն են, և այդ քննարկումներին միջամտելու Բաքվի փորձերը կոպիտ միջամտություն են մեր երկրի ներքին գործերին: Միաժամանակ` ԱԳՆ–ը նաև պատրաստակամություն էր հայտնում կառուցողական և ինտենսիվ աշխատել՝ առաջիկա մեկ ամսվա ընթացքում Խաղաղության համաձայնագիրն ամբողջացնելու և ստորագրելու ուղղությամբ:
Պողոսյանի մեկնաբանմամբ, ԱԳՆ–ի այս հայտարարությամբ ՀՀ իշխանությունները փորձում են Ադրբեջանին հասկացնել, որ երբ ՀՀ–ը խաղաղության պայամանագիրը կստորագրի, դրա վավերացման հետ կապված որևէ խնդիր չի առաջանա։