Ռուսաստանը կոչ է անում ՀՀ պատգամավորներին ներկայացնել Բուչայում իբր սպանվածների ցուցակը, որը նրանց է փոխանցել Կիևը։ Պետերբուրգի միջազգային տնտեսական համաժողովի շրջանակում այս մասին ասել է ՌԴ ԱԳՆ պաշտոնական ներկայացուցիչ Մարիա Զախարովան` պատասխանելով լրագրողների հարցերին։
«Մենք հուսով ենք, որ հայկական պաշտոնական պատվիրակությունը մեզ էլ կտա այնտեղ իբր զոհվածների ցուցակը։ 2 տարի է` չենք կարողանում հասնել նրան, որ ինչ-որ մեկը, այդ թվում` ՄԱԿ-ը, տրամադրի մեզ այն մարդկանց անունները, որոնք իբր զոհվել են այնտեղ»,- ասել է Զախարովան։
Հիշեցնենք` 2022 թվականի ապրիլին ՌԴ պաշտպանության նախարարությունը հայտնել էր, որ ուկրաինական կողմի հրապարակած բոլոր լուսանկարներն ու տեսանյութերը, որոնք իբր վկայում են Կիևի մարզի Բուչա քաղաքում ՌԴ զինվորականների հանցագործությունների մասին, հերթական սադրանքն են։ Ինչպես նշել են ռազմական գերատեսչությունում, այդ բնակավայրի ՝ ռուսական զինված ուժերի վերահսկողության տակ գտնվելու ընթացքում ոչ մի բնակիչ չի տուժել որևէ բռնի գործողությունից: