ԵՐԵՎԱՆ, 7 հունիսի - Sputnik. ԵԱՏՄ շրջանակներում գյուղատնտեսական արտադրանքի առաջարկի և պահանջարկի հավասարակշռության համաձայնեցումը Միության երկրների ազգային տնտեսությունների աճի ապահովման կարևոր գործիք է: Այս մասին Սանկտ Պետերբուրգի միջազգային տնտեսական համաժողովի շրջանակներում անցկացվող «ԵԱՏՄ-ի 10 տարին. արդյունքներ, առաջնահերթություններ, հեռանկարներ» նստաշրջանի ընթացքում հայտարարել է ՌԴ փոխվարչապետ Ալեքսեյ Օվերչուկը:
«Սա ուղերձ է այն մասին, որ մենք առաջին հերթին երաշխավորում ենք մեր քաղաքացիների պարենային անվտանգությունը։ Գիտեք, մենք ԵԱՏՄ շրջանակներում գյուղատնտեսական արտադրանքի առաջարկի և պահանջարկի հավասարակշռության համաձայնեցման պրակտիկա ենք ներդրել՝ բազմամյա վիճակագրության հիման վրա։ Կարծում եմ, որ այս պրակտիկան կշարունակվի և կտարածվի ոչ միայն գյուղմթերքների, այլև այլ ապրանքախմբերի վրա, որոնք նույնպես պետք է հաշվի առնվեն մեր ազգային տնտեսությունների ներսում կայուն, հավասարակշռված աճ և սպառում ապահովելու համար։ Միայն այն, որ մենք հասել ենք 93%-անոց պարենային անվտանգության, ինքնին խոսուն է»,- ընդգծել է Օվերչուկը։
Նրա խոսքով՝ ՌԴ-ն, որը 2023 թվականին նախագահում էր ԵԱՏՄ-ում, առաջարկել է ապագա միության որոշակի պարամետրեր, և դա արտացոլվել է «Եվրասիական տնտեսական ուղի» տնտեսական գործընթացների հետագա՝ մինչև 2030 թվականը և մինչև 2045 թվականը զարգացման մասին հռչակագրում, որը ԵԱՏՄ պետությունների ղեկավարները ստորագրել են անցյալ տարվա դեկտեմբերի 25-ին:
«Մենք բացարձակ ըմբռնում ունենք, որ պետք է զարգացնենք տրանսպորտային ենթակառուցվածքը, որպեսզի ԵԱՏՄ երկրների ազգային արտադրողների համար մրցակցային առավելություններ ստեղծենք արտաքին շուկաներում ներկայանալու համար»,-նշել է քաղաքական գործիչը:
Նա նաև նշել է, որ ԵՏՀ խորհուրդը ԵԱՏՄ երկրներից արտադրանքի արտահանումը դեպի Գլոբալ Հարավ ուղղելու հնարավորություն է տեսնում, իսկ դա կարևոր է բազմաբևեռ աշխարհի ձևավորման տեսանկյունից և պետք է պատասխան դառնա այն գլոբալ մարտահրավերներին, որոնք այսօր կանգնած են եվրասիական ինտեգրացիոն միավորման առջև:
2024 թվականին Եվրասիական տնտեսական միությունը նշում է ԵԱՏՄ-ի մասին 2014 թվականի մայիսի 29-ի պայմանագրի ստորագրման 10-ամյա հոբելյանը: Գիտակցելով ներկայիս արտաքին պայմանների առանձնահատկությունները և ձգտելով բարձր տեխնոլոգիական և նորարարական եվրասիական տարածքի ձևավորման, տնտեսությունների թվայնացման, գործարար ակտիվության խթանման և քաղաքացիների կյանքում դրական փոփոխությունների ապահովման՝ ԵԱՏՄ անդամ պետությունների ղեկավարները սահմանել են Միության հետագա զարգացման վեկտորը՝ 2023 թվականի դեկտեմբերի 25-ին ընդունելով Եվրասիական տնտեսական միության շրջանակներում մինչև 2030 թվականը և մինչև 2045 թվականը տնտեսական գործընթացների հետագա զարգացման մասին «Եվրասիական տնտեսական ուղի» հռչակագիրը:
Եվրասիական ինտեգրման համար որպես առանցքային առաջնահերթություններ նշվել են ԵԱՏՄ ընդհանուր շուկայի ապահովումը առանցքային ապրանքներով և ռեսուրսներով, տեխնոլոգիական զարգացման ոլորտում կոոպերացիոն փոխգործակցության և համագործակցության ընդհանուր տարածքի, ընդհանուր տրանսպորտային-լոգիստիկ տարածության և ընդհանուր ֆինանսական շուկայի ձևավորումը, ինտեգրացիոն ներուժ ունեցող ոլորտներում տնտեսական համագործակցության զարգացումը, ինչպես նաև միջազգային ասպարեզում ԵԱՏՄ-ի՝ որպես տնտեսական ձգողականության բևեռի գործունեությունը: