ԵՐԵՎԱՆ, 6 հունիսի – Sputnik. «Տավուշը հանուն հայրենիքի» շարժման անդամներն ու կողմնակիցները հունիսի 8-ին կմեկնեն Վանաձոր։ Այս մասին այսօր Սուրբ Աննա եկեղեցու բակում հայտարարեց շարժման առաջնորդ Բագրատ սրբազանը։
«Ժամը 12։30 կհավաքվենք «Կարմիր խաչի» մոտ ու կգնանք, ժամը 16։00–ին Վանաձորում հանրահավաք կլինի»,– ասաց նա։
Ինչ վերաբերում է վաղվա ծրագրերին, ապա սրբազանը նշեց, որ միջազգային մամուլի հետ հարցազրույցներ ունի, դրա համար առավոտյան ոչ մի գործողություն չեն անի, իսկ երեկոյան կգնան ինչ–որ տեղ, բայց թե ուր, նա կրկին նախընտրեց գաղտնի պահել։
Բագրատ սրբազանի խոսքով` առաջիկա օրերին ծրագրում են բարձրանալ Եռաբլուր։
Հիշեցնենք` ՀՀ–ում բողոքի ակցիաներ սկսվեցին, երբ ապրիլի 19-ին հայտնի դարձավ, որ Երևանն ու Բաքուն պայմանավորվել են սահմանազատումը սկսել Տավուշի հատվածից։ Հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։
Մայիսի 26–ին Հանրապետության հրապարակում տեղի ունեցած հանրահավաքի ժամանակ հայտարարվեց, որ «Տավուշը հանուն հայրենիքի» անցումային կառավարության վարչապետի թեկնածուն Բագրատ սրբազանն է։