Արսեն Հարությունյանն ու Արման Անդրեասյանը հաղթել են միջազգային մրցաշարում

ԵՐԵՎԱՆ, 6 հունիսի - Sputnik. Հունգարիայի մայրաքաղաք Բուդապեշտում անցկացվող UWW միջազգային վարկանիշային մրցաշարում 61 կգ քաշային կարգում հանդես եկող Արսեն Հարությունյանը, գետնելով իր բոլոր մրցակիցներին հասավ մինչև եզրափակիչ, որտեղ 4։1 հաշվով առավելության հասավ Ղրղզստանի ներկայցուցիչ Թաիրբեկ Ժումաշբեկի նկատմամբ։

Հայաստանը ներկայացնող մյուս երկու ըմբիշները՝ Վազգեն Թևանյանն ու Արման Անդրեասյանը այս մրցումներում հանդես եկան միևնույն՝ 70 կգ քաշային կարգում ու հաղթելով բոլոր մրցակիցներին՝ հասան եզրափակիչ։ Բայց եզրափակիչ գոտեմարտը հայ երկու ըմբիշների միջև չկայացավ, քանի որ Թևանյանը հրաժարվեց գորգ դուրս գալուց։ Այսպիսով UWW վարկանիշային մրցաշարում մենք ունեցանք երկու ոսկե, և մեկ արծաթե մեդալակիր։

Հիշեցնենք, որ 2024 թվականին Փարիզում անցկացվելիք օլիմպիական խաղերի ազատ ոճայինների մրցաշարում մասնակցելու են Արսեն Հարությունյանն ու Վազգեն Թևանյանը, բայց Արսենը հանդես է գալու 57կգ քաշային կարգում, իսկ Վազգենը՝ 65կգ քաշային կարգում։