ԵՐԵՎԱՆ, 5 հունիսի – Sputnik. «Հյուսիս-Հարավ» տրանսպորտային ճանապարհը կարող է պահանջված միջազգային միջանցք դառնալ։ Այս մասին Սանկտ Պետերբուրգի միջազգային տնտեսական համաժողովի շրջանակում համաշխարհային լրատվական գործակալությունների ղեկավարների հետ հանդիպման ժամանակ հայտարարեց ՌԴ նախագահ Վլադիմիր Պուտինը։
Նշենք, որ հանդիպմանը մասնակցում են նաև ոչ բարեկամական երկրների ներկայացուցիչները։
«Ինչ վերաբերում է «Հյուսիս-Հարավ» ճանապարհին, ապա այն կարող է վերածվել շատ լավ և պահանջված միջազգային միջանցքի։ Այդպես կլինի, երբ բեռները հենց այստեղից՝ Սանկտ Պետերբուրգի նավահանգստից, ամբողջ եվրոպական մասով կուղևորվեն Ադրբեջան, այնուհետև Իրան և դուրս կգան Պարսից ծոցի ափ»,- ասաց ՌԴ նախագահը։
Պուտինի խոսքով՝ նախագիծը խոստանում է շատ շահավետ և պահանջված լինել, քանի որ այն թույլ կտա բեռները հասցնել 10 օր ավելի արագ, քան Սուեզի ջրանցքով:
ՌԴ նախագահը հավելեց, որ այդ նախագծի մեջ ներդրումներ անելը հուսալի է և շահութաբերությունը կլինի երաշխավորված։ Ըստ Պուտինի՝ օտարերկրյա ներդրողները, այդ թվում արաբական ինքնիշխան հիմնադրամները, հետաքրքրություն են ցուցաբերել «Հյուսիս-Հարավ» միջանցքում ներդրումների նկատմամբ։
Սանկտ Պետերբուրգի միջազգային տնտեսական համաժողովը (ՍՊՏՀ) անցկացվում է հունիսի 5-ից 8-ը: ՌԻԱ Նովոստին և Sputnik-ը համաժողովի տեղեկատվական գործընկերներն են։