Անշարժ գույքը բիրժային ապրանք է, դրա գինը մի օր կարող է բարձրանալ, մյուս օրն` իջնել։ Sputnik Արմենիայի եթերում ասել է «House Key» անշարժ գույքի գործակալության փոխտնօրեն Կարապետ Հովհաննիսյանը` մեկնաբանելով անշարժ գույքի գների ու գործարքների մասին պաշտոնական տվյալները։
«Երբ որ դու պատերազմի միջով ես անցել, անկայուն քաղաքական վիճակ ունես և սահմանին ունես թշնամի, որն ամեն առավոտ նոր ախորժակով նոր պահանջներ է քո դեմ ներկայացնում, պետք է ընկալես, որ չեն կարող քեզ մոտ անշարժ գույքի գներն աճել»,– ասել է Հովհաննիսյանը։
Գործարարը չի հերքում` պահանջարկ կա, բայց միայն նորակառույցների նկատմամբ։ Երկրորդային շուկան արդեն տևական ժամանակ լճացած վիճակում է։
ֆինանսական համակարգի 2023 թվականի կայունության մասին տարեկան հաշվետվության մեջ ԿԲ–ը արձանագրել է, որ Հայաստանում 2023 թվականին բարձրացել են և՛ հիփոթեքային դրույքաչափերը, և՛ անշարժ գույքի գները։
Բանկի նախագահ Մարտին Գալստյանի համոզմամբ` գների բարձրացումը հիմնականում պայմանավորված է եկամտահարկի վերադարձով ու դրա արդյունքում էապես բարձրացած պահանջարկով։ 2025թ–ի հունվարի 1-ից, երբ Երևանում դադարի գործել եկամտահարկի վերադարձը, ԿԲ–ի նախագահի խոսքով գները կարող են մինչև 30%–ով էժանանալ։