ԵՐԵՎԱՆ, 4 հունիսի – Sputnik. «Տավուշը հանուն հայրենիքի» շարժման ընթացքում Բագրատ սրբազանը հանդիպել է ՀՀ նախագահներից միայն Սերժ Սարգսյանին, իսկ շարժումից մոտ 15 օր առաջ՝ ՀՀ առաջին նախագահ Լևոն Տեր Պետրոսյանին։ Այս մասին լրագրողների հետ զրույցում ասաց Բագրատ սրբազանը։
Նա հայտնեց, որ Սերժ Սարգսյանի հետ էլ, Լևոն Տեր–Պետրոսյանի հետ էլ, բավականին քննարկումներ են ունեցել իրավիճակի մասին։ Նա ընդգծեց, որ չնայած տարբեր շահարկումներին, ինքը Ռոբերտ Քոչարյանի հետ չի հանդիպել։
Հարցին, թե երբևէ հանդիպել է ՀՀ ներկայիս նախագահ Վահանգն Խաչատուրյանի հետ, Բագրատ սրբազանը պատասխանեց, որ նրան տեսել է 2018 թվականի շարժման օրերին։
«Երկրում ինչ ասես տեղի է ունենում, նախագահը ժպիտով ման է գալիս, ոչ մտահոգություն, ոչ հեռավոր երազ, ոչ ինչ–որ թեզ, դա վկայում է այն մասին, որ էս մարդիկ երկրի հետ, այդ պաշտոնի հետ կապ չունեն։ Նրան տեսել եմ 2018 թվականի շարժման օրերին, ուրախ-զվարթ էր, ինչ–որ բաներ էր ասում էս վարչապետի հասցեին, ձեռ էին առնում, բան էին անում, մի քանի ընկերներով, մյուսների անունը չեմ տալիս»,–ասաց Բագրատ սրբազանը։
Նա ընդգծեց, որ Վահագն Խաչատուրյանը նախկինում ՀԱԿ–ից էր, իսկ ինքն այդ կուսակցությունում շատ ընկերներ, մտերիմներ ունի։
«Այս ընթացքում ՀԱԿ–ից էլ ինձ բավականին շատ խորհուրդներ են տվել , սա անելու, նա անելու,այսպես խոսելու, այս շեշտադրումն անելու, չեմ թաքցնում, ես հետևել եմ այդ խորհուրդներին թե ներքին տարբեր հարցերի վերաբերյալ, թե արտաքին ազդակների, մարտահրավերների վերաբերյալ»,–ասաց նա։
Հայաստանում բողոքի ակցիաներ սկսվեցին, երբ ապրիլի 19-ին հայտնի դարձավ, որ Երևանն ու Բաքուն պայմանավորվել են սահմանազատումը սկսել Տավուշի հատվածից։ Հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։
Մայիսի 26–ին Հանրապետության հրապարակում տեղի ունեցած հանրահավաքի ժամանակ հայտարարվեց, որ «Տավուշը հանուն հայրենիքի» անցումային կառավարության վարչապետի թեկնածուն Բագրատ սրբազանն է։