ԵՐԵՎԱՆ, 4 հունիսի – Sputnik. Ֆրանսիացի ֆուտբոլիստ Կիլիան Մբապեն հայտարարել է, որ պայմանագիրը չերկարաձգելու պատճառով ՊՍԺ-ում իրեն սպառնացել են պահեստայինների նստարանով, և միայն մարզիչ Լուիս Էնրիկեի և մարզական տնօրեն Լուիս Կամպոսի բարեխոսությունն է օգնել իրեն: Տեղեկությունը հայտնում է ՌԻԱ Նովոստին՝ հղում անելով արտասահմանյան լրատվամիջոցներին։
Հունիսի 3-ին Մադրիդի «Ռեալը» հայտարարեց Մբապեի հետ 5 տարվա պայմանագիր կնքելու մասին: Հարձակվողն ազատ գործակալի կարգավիճակով իսպանական ակումբ է տեղափոխվել ՊՍԺ-ի հետ պայմանագիրը չերկարաձգելու պատճառով:
«Ինձ հասկացրին, որ չեմ խաղալու։ Ինձ դա ասել են ուղիղ դեմքիս, ինձ հետ շատ կոշտ են խոսել։ Ինձ փրկել են Լուիս Էնրիկեն և Լուիս Կամպոսը: Առանց նրանց ես երբեք խաղադաշտ դուրս չէի գա», – ասել է Մբապեն:
Միևնույն ժամանակ ֆուտբոլիստը, իր իսկ խոսքով, դժգոհ չի եղել ՊՍԺ-ից: Մբապեի տեսանկյունից` խայտառակություն կլիներ այդպես խոսել այն մարդկանց առջև, որոնք պաշտպանում են իրեն։
«Որոշ հանգամանքներ ինձ վրդովեցրել են։ Բայց ինձ նման ֆուտբոլիստը չէր կարող դա ցույց տալ, չէ՞ որ ես առաջատար եմ։ Ինձ նայում էին, ուստի փորձում էի հնարավորինս դրական լինել։ Մարզիչը, ֆուտբոլիստները, ակումբի աշխատակիցներն աջակցում էին ինձ։ Ստորություն կլիներ թքել նրանց մեջքին՝ հայտարարելով, որ ես դժբախտ եմ եղել», – պարզաբանել է ֆուտբոլիստը։
Մբապեն խաղացել է ՊՍԺ-ում հանդես 2017 թվականից: Փարիզցիների կազմում հարձակվողը դարձել է Ֆրանսիայի վեցակի չեմպիոն, չորս անգամ նվաճել երկրի գավաթը։