ԵՐԵՎԱՆ, 4 հունիսի – Sputnik, Խաչիկ Չախոյան. Ֆուտբոլի Հայաստանի ազգային հավաքականը ընկերական խաղում Լյուբլյանայում 1։2 հաշվով պարտվեց Սլովենիայի ընտրանուն։
Խաղից առաջ էր պարզ էր, որ մրցող կողմերի համար հանդիպման արդյունքը առաջնային չի համարվելու։ Բայց բոլոր թիմերն էլ խաղադաշտ դուրս են գալիս միմիայն հաղթելու համար, և այս հանդիպումը այդ տեսանկյունից բացառություն չէր։
Առաջին կեսը անցավ հանգիստ պայքարում։ Սլովենացիները արագ հասան հաջողության, բայց մինչև ընդմիջում դաշտի տերերի նվազագույն առավելությունը մնաց ուժի մեջ։
Երկրորդ խաղակեսի առաջին 15 րոպեների ընթացքում Հայաստանի հավաքականը բացահայտ առավելություն ուներ, ու գոլային իրական առնվազն երեք պահ ունեցանք, սակայն դարպասը չէինք կարողանում գրավել։
Նման դեպքերում ասում են, որ գոլը հասունանում է, ու Վարազդատ Հարոյանը անկյունայինի փոխացնումց հետո գլխի հարվածով խփեց պատասխան գնդակը։
Սակայն մերոնց ուրախությունը երկար չտևեց։ Բաց թողած գոլից հետո փոխարինման դուրս եկած Յոսիպ Իլյիչիչը նորից առաջ մղեց սլովենացիներին։ Մարզիչները սկսեցին ավելի ակտիվորեն փոփոխությունների դիմել։
Պարզ է, որ մերոնք փորձում էին «փրկել» խաղը։ Ցավոք, հիանալի խաղակես անցկացնելով հանդերձ, մեր հավաքականը չկարողացավ խուսափել պարտությունից, և խաղն ավարտվեց 1։2 հաշվով։
Երեք օր անց` հունիսի 7-ին, Հայաստանի ազգային հավաքականը Երևանում հյուրընկալելու է Ղազախստանի հավաքականին։ Այդ հանդիպումը նույնպես ընկերական բնույթ է կրելու։