ԵՐԵՎԱՆ, 3 հունիսի – Sputnik. Լոռու մարզում հեղեղումներից տուժած համայնքների բնակիչների տեղաշարժն ապահովելու համար հունիսի 4–ից առավոտյան և երեկոյան ժամերին երկու ուղղությամբ մարդատար մեքենաներ կաշխատեն։ Տեղեկությունը Sputnik Արմենիայի հետ զրույցում հայտնեց Ալավերդի համայնքի ղեկավար Դավիթ Ղումաշյանը։
«Վաղվանից Շամլուխից դեպի Ախթալայի փլուզված կամուրջ և Քարկոփից (Ճոճկանով, Այրումով) դեպի Ախթալայի փլուզված կամուրջ կաշխատեն մարդատար մեքենաներ։ Բնական է, որ մարդիկ պետք է ոտքով անցնեն կամուրջները»,–ասաց նա։
Ղումաշյանը հավելեց` ժամանակավոր հավաքովի կամուրջներ կառուցելու առաջարկություններ կան տարբեր երկրներից, մասնավորապես` Իրանից։
«Իմ տեղեկություններով` ինտենսիվ քննարկումներ է գնում, թե որտեղից է ճիշտ բերել, որ ավելի արագ և որակով լինի։ Այլընտրանքային ճանապարհ ունենք, որ շատ բարդ ճանապարհ է միայն ամենագնաց մեքենաների համար, խորհուրդ ենք տալիս մեր բնակիչներին միայն ծայրահեղ դեպքերում օգտվել ճանապարհից»,–ասաց համայնքապետը։
Պատասխանելով հարցին, թե արդյոք այսքանից հետո մարդիկ կկարողանան ապրել տուժած համայնքներում, Ղումաշյանը պատասխանեց, որ չնայած ինքը մասնագետ չէ ու միանշանակ չի կարող այդ հարցին պատասխանել, բայց վստահեցրեց` իրենք ամեն ինչ կանեն, որ մարդիկ շարունակեն ապրել իրենց բնակավայրերում։
Նա նշեց, որ այժմ քննարկվում է բնակիչներին շինանյութեր տրամադրելու հարցերը, որպեսզի իրենք իրենց ուժերով վերանորոգեն տները։
«Եթե մենք համաձայնության գանք կառավարության հետ, և տրամադրվի շինանյութ, համայնքապետարանն էլ կկազմի նախագծեր, որպեսզի շինությունները միանման լինեն, մեծ ու փոքր չլինեն։ Բայց համայնքի բնակիչներն իրենց ներդրումը պարտադիր պետք է ունենան»,–ասաց համայնքապետը։
Հիշեցնենք` մայիսի 26–ի տեղատարափ անձրևներից հետո Լոռու և Տավուշի մարզերում Դեբեդ, Աղստև և Տաշիր գետերի վարարման հետևանքով 4 մարդ է մահացել։
Որոշում է կայացվել Լոռու և Տավուշի մարզերի տուժած բնակավայրերը հայտարարել աղետի գոտի և մարզպետարաններին 300 մլն դրամ հատկացնել հեղեղումների հետևանքները վերացնելու համար։