ԵՐԵՎԱՆ, 3 հունիսի – Sputnik. «Տավուշը հանուն հայրենիքի» բողոքի շարժման առաջնորդ Բագրատ սրբազանը կոչ արեց շարժմանը սատարող քաղաքական ուժերին հստակ գործողություններով ցույց տալ իրենց համերաշխությունը։ Այս մասին նա հայտարարեց ՀՀ քննչական կոմիտեի մոտ տեղի ունեցող բողոքի ակցիայի ժամանակ։
Սրբազանը նշեց, որ քաղաքական ուժերի ներկայացուցիչները կարող են ճանապարհներ փակել, տարբեր ձևերով արձագանքել ոստիկանության գործողություններին և ապօրինություններին, ցուցարարների ձայնը ներկայացնել միջազգային կառույցների վարքագծին:
«Ես ուզում եմ, որ ԱԳՆ–ի մոտ տեղի ունեցած միջադեպից հետո բոլորն ավելի ակտիվ լինեն»,– ասաց նա:
Շարժման առաջնորդը հայտարարեց, որ քննարկվում են բոլոր հնարավոր տարբերակները, որոնք կարող են հանգեցնել իշխանափոխության:
Հարցին, թե արդյոք դիտարկվում է ընդդիմադիր «Հայաստան» և «Պատիվ ունեմ» խմբակցությունների պատգամավորների մանդատները վայր դնելու հարցը, Գալստանյանը կրկին նշեց` բոլոր տարբերակները դիտարկվում են:
Հայաստանում բողոքի ակցիաներ սկսվեցին, երբ ապրիլի 19-ին հայտնի դարձավ, որ Երևանն ու Բաքուն պայմանավորվել են սահմանազատումը սկսել Տավուշի հատվածից։ Հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։
Մայիսի 26–ին Հանրապետության հրապարակում տեղի ունեցած հանրահավաքի ժամանակ հայտարարվեց, որ «Տավուշը հանուն հայրենիքի» անցումային կառավարության վարչապետի թեկնածուն Բագրատ սրբազանն է։